އިންޑިއާގެ ވައިގެ ސިފައިންގެ ފްލައިޓެއްގައި ކުވައިތުގައި ހިނގި އަލިފާނުގެ ހާދިސާއެއްގައި މަރުވި އެގައުމުގެ 45 މީހުންގެ ހަށިގަނޑު އަނބުރާ ގެނެސްފިއެވެ.

ބުދަ ދުވަހު އަލިފާން ރޯވެފައިވަނީ އިންޑިއާގެ 176 މަސައްކަތްތެރިން ދިރިއުޅޭ މަންގަފް ސިޓީގެ ރެސިޑެންޝަލް އިމާރާތެއްގައެވެ.

ކުވައިތުގެ ކަމާބެހޭ ފަރާތްތަކުން ބުނި ގޮތުގައި އަލިފާނުގެ ހާދިސާގައި 50 މީހުން މަރުވެފައިވާއިރު އޭގެ ތެރޭގައި އިންޑިއާގެ 45 މީހުންނާއި ފިލިޕީންސްގެ ތިން މީހުން ހިމެނެ އެވެ. ދެ ހަށިގަނޑެއް އަދި ދެނެގަނެވިފައެއް ނުވެއެވެ.

ބުރާސްފަތި ދުވަހު އިންޑިއާގެ މިނިސްޓަރަކު ވަނީ ހާދިސާގައި ގެއްލުން ލިބުނު މީހުން ދެނެގަނެ ގައުމަށް ގެނދިއުމަށް ކުރާ މަސައްކަތްތައް ކޯޑިނޭޓް ކުރައްވުމަށް ކުވެއިތަށް ވަޑައިގެންފައެވެ.

ކުވައިތުގެ އާބާދީގެ ތިންބައިކުޅަ ދެބައި އެކުލެވިގެންވަނީ ބިދޭސީ މަސައްކަތްތެރިންނެވެ. ޚާއްޞަކޮށް ކޮންސްޓްރަކްޝަން އަދި ޑޮމެސްޓިކް ދާއިރާގައި ބިދޭސީންގެ މަސައްކަތަށް ވަރަށް ބޮޑަށް ބަރޯސާވެފައިވާ ޤައުމެކެވެ.

އިންސާނީ ހައްގުތަކާ ބެހޭ ޖަމާއަތްތަކުން ވަނީ އެމީހުންގެ ދިރިއުޅުމުގެ ހާލަތާ މެދު ގަވާއިދުން ކަންބޮޑުވުން ފާޅުކޮށްފަ އެވެ.

އަލިފާނުގެ ހާދިސާގައި އިތުރު އެތައް ބަޔަކަށް އަނިޔާވެފައިވާއިރު، އޭގެ ތެރޭގައި ގިނައީ އިންޑިޔާ މީހުންނެވެ.

އިންޑިއާގެ މިނިސްޓަރު ކިރްތީ ވަރްދާން ސިންގް ވިދާޅުވީ މި ހާދިސާގެ ޝިކާރައަކަށް ވެފައިވާ މީހުން ދެނެގަތުމަށް ޑީއެންއޭ ޓެސްޓުތައް ހަދަމުން އަންނަ ކަމަށެވެ.

މަރުވެފައިވާކަން ކަށަވަރުވި މަސައްކަތްތެރިންގެ ތެރޭގައި ކެރެލާ ސްޓޭޓުން 23 މީހުންނާއި ތަމިލް ނާޑޫގެ ހަތް މީހުންނާއި އަދި އުއްތަރު ޕްރަދޭޝްގެ ތިން މީހުންނާއި އޮޑިޝާގެ ދެ މީހުންނާއި ބިހާރު، ޕަންޖާބު، ކަރްނާޓަކާ، މަހާރާޝްތުރާ، ހުޅަނގު ބެންގަލް، ޖަރުކަންދު އަދި ހަރިޔާނާއަށް ނިސްބަތްވާ މީހުންވެސް ހިމެނެ އެވެ.

އިންޑިޔާ ސަރުކާރުގެ މިނިސްޓަރ ސިންގް ވިދާޅުވީ އެ ހަށިތައް އަނބުރާ ގެނައުމަށް އިންޑިއާ ސަރުކާރުން އެއާފޯސްގެ ހާއްސަ ފްލައިޓެއް ހަމަޖައްސާފައިވާ ކަމަށެވެ.

ހުކުރު ދުވަހުގެ ހެނދުނު ކެރެލާގެ ކޮޗީ ސިޓީއަށް ފްލައިޓް ޖެއްސައި، އިންޑިއާގެ ދެކުނުގެ ސްޓޭޓްތަކުގެ މަސައްކަތްތެރިންގެ ހަށިތައް ކަމާބެހޭ ފަރާތްތަކަށް ދިނުމަށް ފަހު، ދިއްލީއަށް އަށް ފުރާނެއެވެ.

ކެރެލާގެ ޗީފް މިނިސްޓަރު ޕިނަރައީ ވިޖަޔަން އާއި ސްޓޭޓްގެ އެހެން ގާނޫނު ހަދާ މަޖިލީހުގެ މެމްބަރުން ވަނީ ހަށިތައް ބަލައިގަތުމަށް އެއާޕޯޓަށް ވަޑައިގެންފައެވެ.

ސްޓޭޓް ސަރުކާރުން ވަނީ މަސައްކަތްތެރިންގެ ހަށިތައް އަނބުރާ ގެތަކަށް ގެންދިއުމަށް އެމްބިއުލާންސް ހަމަޖައްސާފައެވެ.

"މިއީ އަޅުގަނޑުމެންގެ ގައުމަށް ލިބުނު ވަރަށް ބޮޑު ހިތާމައެއް. ކެރެލާގެ މަސައްކަތްތެރިންނަކީ އަޅުގަނޑުމެންގެ ސްޓޭޓްގެ ފުރާނަ. ކުވައިތުގައި ހިނގި އަލިފާނުގެ ހާދިސާއަކީ އަޅުގަނޑުމެންގެ މުޖުތަމައަށް އަސަރުކުރި އެންމެ ބޮޑު އެއް މުސީބާތް،" ވިޖަޔަން ވިދާޅުވިއެވެ.

އަލިފާނުގެ ހާދިސާގައި މަރުވި މީހުންގެ އާއިލާތަކަށް ބަދަލު ދޭނެކަން ސްޓޭޓް އަދި ފެޑެރަލް ސަރުކާރުން ވަނީ އިއުލާންކޮށްފައެވެ.