ދިވެހިރާއްޖެއިން ޙައްޖުގެ މަތިވެރި އަޅުކަން އަދާކުރަން ދިޔަ ހުރިހަ ޙައްޖާޖީންގެ ހާލުވެސް ރަގަޅުކަމަށާ މިހާރު އެ ހުރިހާ ޙައްޖާޖީއިންވެސް ތިބީ ޢަރަފާތު ބިމުގައި ކަމަށް ރާއްޖޭގެ ޙައްޖު މިޝަން އިން ބުނެފިއެވެ.

ދިވެހި ޙައްޖުވެރިން ޢަފަރާތު ބިމަށް ދިއުމަށް ދަތުރު ފަށާފައިވަނީ ރޭގެ ވަގުތެއްގައެވެ. ޙައްޖުގެ މަތިވެރި އަޅުމުގެ އެންމެ މުހިއްމު ރުކުނަކީ ޢަރަފާތު ބިމުގައި މަޑުކުރުމެވެ. އެގޮތުން ހައްޖު މަހުގެ 9 ވަނަ ދުވަހު (ޢަރަފާތް ދުވަހު) ވަގުތު ހޭދަކުރުމުގެ ފުރުސަތު ނުލިބިއްޖެނަމަ ހައްޖު ނުލިބޭނެއެވެ.

ހައްޖުގެ މަތިވެރި އަޅުކަން އަދާކުރުމަށް ސައުދީ އަރަބިއާއަށް ދުނިޔޭގެ އެކި ކަންކޮޅުތަކުން ހާޒިރުވެތިބި މުސްލިމުން މިއަދު އަރަފާތު ބިމަށް ޖަމާވާއިރު، އަރަފާތު ބިމުގައި މިއަދު ފިނި ހޫނުމިން ހުންނާނީ 45 ޑިގްރީ ސެލްސިއަސްގައި ކަމުގައި ސައުދީ އަރަބިއާގެ ރަސްމީ ފަރާތްތަކުން ވަނީ ހާމަކޮށްފައެވެ.

މިއަދުގެ ޙައްޖު ޚުޡުބާގައި މެދުމިނުގެ އުސޫލުތަކަށް އިސްކަންދީ، އިންސާނިއްޔަތު އެއްބައިވަންތަ ކުރުވުމަށް ގޮވާލާނެ ކަމުގައި ސައުދީ އަރަބިއާގެ އޮފިޝަލުން ވަނީ ވިދާޅުވެފައެވެ. މިއަދުގެ ޙައްޖު ޚުޡުބާ އިއްވަން ފައްޓަވާނީ ސައުދީ އަރަބިއާގެ ގަޑިން މެންދުރު 12:20 ގައެވެ. އެއީ ރާއްޖޭގެ ގަޑިން 2:20 ގައެވެ.

މިއަހަރުގެ ޚުޠުބާ ދެއްވާނީ ސަޢޫދީގެ މަޝްހޫރު ދީނީ ޢިލްމުވެރިޔާ މަހެރު އަލް މުޢައިޤާލީއެވެ. ޙައްޖުގެ މަތިވެރި އަޅުކަން އަދާކުރުމުގެ އެންމެ މަތިވެރި ދުވަސް ކަމުގައިވާ ޢަރަފާތު ދުވަހުގެ މުނާސަބަތުގައި ދެއްވާ ޚުޠުބާގައި މިއަހަރު 50 ބަހަކުން ތަރުޖަމާ ކުރެވިގެންދާނެ ކަމުގައި ސަޢޫދީގެ އޮފިޝަލުން ވަނީ ހާމަކޮށްފައެވެ.

50 ބަހަކުން އަރަފާތުގެ ޚުޡުބާ ތަރުޖަމާ ކުރެވިގެންދާއިރު، ދުނިޔޭގެ އެކި ކަންކޮޅުތަކުގައި ގާތްގަނޑަކަށް އެއް ބިލިއަން މީހުންނަށް ޚުޡުބާއިން ދޭ ނަސޭހަތްތައް ތަރުޖަމާ ވެގެންދާނެއެވެ.

މިއަހަރު ސަޢޫދީ ޢަރަބިއްޔާގެ އެތެރެއިންނާ ބޭރުން 2 މިލިއަނަށްވުރެ ގިނަ މުސްލިމުން ޙައްޖުގެ އަޅުކަން އަދާކުރެއެވެ.