1445 އަހަރުގެ ޙައްޖުގެ މަތިވެރި އަޅުކަން އަދާކުރުމަށް ސަޢުދީ ޢަރަބިއްޔާއަށް ދިޔަ ދިވެހި ޙައްޖުވެރިންގެ ފުރަތަމަ ގުރޫޕު އަންނަ ހޯމަ ދުވަހު ރާއްޖެ އައުމަށް ފުރާނެކަމަށް އިސްލާމީ ކަންތައްތަކާބެހޭ ވުޒާރާއިން ހާމަކޮށްފިއެވެ.

އިސްލާމިކު މިނިސްޓަރު ޑރ. މުހައްމަދު ޝަހީމު އަލީ ސައީދު ނޫސްވެރިންނަށް ފޮނުއްވި މެސެޖެއްގައި ހަމަކުރައްވާފައިވާ ގޮތުގައި މި އަހަރުގެ ޙައްޖުގެ އަޅުކަމަށް ފަހު ހުރިހާ ޙައްޖުވެރިން މިހާރު ރާއްޖެ އައުމަށް ތައްޔާރުވެފައިވާ ކަމަށެވެ.

އެގޮތުން ޙައްޖުގެ އަޅުކަން އަދާކުރުމަށް ދިޔަ ހުރިހާ ދިވެހިންވެސް ޙައްޖުގެ އަޅުކަން އަދާކުރުމަށްފަހު އަނބުރާ ރާއްޖެ އައުމަށް މިހާރު ތައްޔާރުވެފައިވާ ކަމަށާ ޙައްޖުވެރިން އެނބުރި ރާއްޖެ އަންނާނީ 4 ފްލައިޓެއްގައިކަމަށް ހާމަކޮށްފައިވެއެވެ.

ރާއްޖެ އައުމަށް ޙައްޖުވެރިން ފުރާ ދުވަސްތައް:

• މިމަހުގެ 24 ވަނަ ދުވަސް
• މިމަހުގެ 28 ވަނަ ދުވަސް
• އަންނަ މަހުގެ 1 ވަނަ ދުވަސް
• އަންނަ މަހުގެ 4 ވަނަ ދުވަސް

ވަޒީރު އިތުރަށް ވިދާޅުވީ، ދިވެހި ޙައްޖުވެރީންގެ ތެރެއިން މިހާތަނަށް 1 ޙައްޖުވެރިޔަކު ނިޔާވެފައިވާ ކަމަށެވެ. އަދި މިވަގުތު ހޮސްޕިޓަލުގައި 1 ޙައްޖުވެރިއަކަށް ފަރުވާ ދެމުންދާއިރު، ޢާންމު ގޮތެއްގައި ހުރިހާ ޙައްޖުވެރިންގެ ޙާލު ރަނގަޅުކަމަށް އެ ވުޒާރާއިން ވިދާޅުވިއެވެ.

ޙައްޖުވެރިނަށް ފުރިހަމަ އިންތިޒާމުތަކެއް ހަމަޖެއްސުމަށް އިސްލާމީ ކަންތައްތަކާބެހޭ ވުޒާރާއިން ވަނީ ގިނަ މަސައްކަތްތަކެއް ކުރައްވާފައެވެ. އެގޮތުން ޙައްޖާޖީންނަށް ފެންވަރު ރަނގަޅު ދިވެހި ކެއުމާއި ބަލި މީހުންނަށް މަތީ ދަރަޖައިގެ ސިއްޙީ ޚިދުމަތް ފޯރުކޮށްދެވުނުކަމަށް އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެފައިވެއެވެ.

މީގެ އިތުރުން ޙައްޖު މިޝަންގެ އިންތިޒާމުތައް ހަމަޖެހިފައިވާ ގޮތުން ބަލި މީހުން ހިމެނޭހެން ހުރިހާ އެންމެންވެސް އަރަފާތައް ގެންދެވުނުކަންވެސް ވަޒީރު ފާހަގަކުރެއްވިއެވެ.

މި އަހަރު ރާއްޖެއިން ޖުމްލަ 1150 މީހުންވަނީ ޙައްޖަށް ގޮސްފައެވެ.