ޣައްޒާގައި ހުންނަ ފަލަސްތީނުގެ ލެޖިސްލޭޓިވް ކައުންސިލުން ވަނީ އިސްރާއީލުގައި ފަލަސްތީނު ރައްޔިތުން ބަންދުކުރާ މަރުކަޒުތައް ބައިނަލްއަގްވާމީ ގޮތުން އިންސްޕެކްޓް ކުރުމަށް ގޮވާލާފައެވެ.

މީގެ މަރުކަޒަކުން ދޫކޮށްލި މީހުންގެ ތެރޭގައި ހަމާސްއާ ގުޅުން ހުރި ކަމަށް ތުހުމަތު ކުރެވޭ ކައުންސިލްގެ ކުރީގެ ރައީސް އަޒީޒް ދުވެއިކް ވެސް ހިމެނިވަޑައިގަންނަވައެވެ. އޭނާ ދޫކޮށްލި އިރު ހުރީ ކުރިންހުރި ވަރަށް ވުރެ މާ ބޮޑަށް ހިކި އަނަރޫފަވެފައެވެ.

އެ ކައުންސިލުން ބުނީ "ދުޝްމަނުން ގައިދީންނާ ދެކޮޅަށް ހިންގާ ޖަރީމާތައް ރުޅިވެރިކަމާ އެކު ބަލަމުންދާ ކަމަށާއި އެންމެ ބޮޑު މިސާލަކީ ޑރ.އަޒީޒް ދުވެއިކް ޖަލުން ނުކުމެވަޑައިގަތުމުން ނަގާފައިވާ ފޮޓޯ" ކަމަށެވެ.

އަދި ގައިދީން ބަނޑުހައިހޫނުކަމާއި އެކަހެރިކުރުމާއި އަނިޔާގެ ޝިކާރައަކަށްވެފައިވާ ކަމަށް ކައުންސިލުން ތުހުމަތުކުރެއެވެ.

ދުވެއިކް ހުކުރު ދުވަހު ވިދާޅުވީ ހައްޔަރު ކޮށްފައި ތިބި ގައިދީންނަކީ "ދުވާލަކު 24 ގަޑިއިރު ބަނޑުހައިވެގެން އުޅޭ ބައެއް ކަމަށެވެ. ގައިދީންގެ ސިއްހީ ހާލަތު ދަށްވެ، ހަމުގެ ބަލިތައް ތަހައްމަލު ކުރަމުންދާއިރު، ގައިދީންނަށް ދޭ ކާނާ ކުޑަކުދިންނަށް ވެސް ނުފުދޭ" ކަމަށެވެ.

އޭނާ އިތުރަށް ވިދާޅުވީ ޖަލުތަކުގައި ހަކުރު، ލޮނު، އަދި މޭވާ ގާތްގަނޑަކަށް ނެތް ކަމަށެވެ.

މި ހަފްތާގައި ނެގޭވް އަދި އޮފަރު ޖަލުން ދޫކޮށްލި ގާތްގަނޑަކަށް 30 ގައިދީންގެ ތެރެއިން ގިނައީ އިދާރީ ބަންދު މީހުން ކަމަށާއި، އެމީހުންގެ މައްޗަށް އެއްވެސް ކުށެއްގެ ދައުވާއެއް އުފުލާފައެއް ނުވެއެވެ.

އޭގެ ތެރެއިން އެކަކީ، ފަލަސްތީނުގެ ގައިދީންގެ ޖަމްޢިއްޔާއިން ބުނާ ގޮތުގައި، އިސްރާއީލުގެ ޖަލުތަކުގައި 21 އަހަރު ހޭދަކޮށްފައިވާ ޓޫލްކާމްގެ ސަޢީދު އަބޫ ޝަނާބެވެ.

ޕްރިޒަނަރސް ސޮސައިޓީން ބުނީ ގައިދީންގެ ޙާލަތުން "ބޭސްފަރުވާގެ ކުށްތަކުގެ އިތުރުން އަނިޔާކުރުމާއި ގޯނާކުރުމާއި ބަނޑުހައިހޫނުކަމުގެ ޢަމަލުތައް ހިމެނޭގޮތަށް ބަންދުގައި ބެހެއްޓުމުގެ ހަރުކަށި އަދި ނިކަމެތި ޙާލަތްތައް ދައްކުވައިދޭ" ކަމަށެވެ.

ޕްރިޒަނަރސް ސޮސައިޓީން އޭޕްރީލް މަހު ބުނެފައި ވަނީ ދޫކޮށްލި ބަންދުގައި ތިބި މީހުންގެ ބޮޑު ބަޔަކީ ސިއްހީ މައްސަލަތަކެއް ދިމާވެފައިވާ ބައެއް ކަމަށާއި "އެކަމުގެ ސަބަބުން ބައެއް މީހުން ދޫކޮށްލުމާއެކު ވަގުތުން ހޮސްޕިޓަލަށް ބަދަލުކުރަން ޖެހުނު" ކަމަށެވެ.