ސްވިޒަލޭންޑްގައި ޔޫކްރޭނުން ބޭއްވި ކޮންފަރެންސްގައި ތަރައްގީވަމުން އަންނަ މުހިންމު ބައެއް ގައުމުތަކުން ބައިވެރިނުވި ނަމަވެސް، ރަޝިއާގެ ދެ އަހަރުވީ ހަނގުރާމަ ނިމުމަކަށް ގެނައުމަށް ސުލްހައިގެ އެއްވެސް އެއްބަސްވުމެއްގެ އަސާސަކީ ޔޫކްރެއިންގެ ސަރަހައްދީ އެއްބައިވަންތަކަން ކަމަށް ގާތްގަނޑަކަށް 80 ގައުމަކުން އާދީއްތަ ދުވަހު ގޮވާލިއެވެ. ނަމަވެސް ޑިޕްލޮމެސީގައި ކުރިއަށް ދާނެ މަގެއް އަދި ސާފެއް ނުވެއެވެ.

ދެދުވަހުގެ މި ކޮންފަރެންސަށް ރަޝިޔާއަށް ދައުވަތު ދީފައެއް ނުވެއެވެ .  ކުރިއަށް އޮތްތަނުގައި ސުލްހައިގެ ރޯޑް މެޕެއްގައި ރަޝިޔާ ވެސް ބައިވެރިވެދާނެ ކަމުގެ އުންމީދު ބައިވެރިވި ގިނަ ބަޔަކު ވަނީ ފާޅުކޮށްފައެވެ.

100 އެއްހާ ވަފުދު ބައިވެރިވި، ސުލްހައަށް އެޅި ފުރަތަމަ ފިޔަވަޅެއްގެ ގޮތުގައި ބިލްކޮށްފައިވާ މި ކޮންފަރެންސްގައި ގިނައީ ހުޅަނގުގެ ގައުމުތަކެވެ .  ބައިވެރިވި ގައުމުތަކުގެ ތެރޭގައި ފްރާންސް، ޖަރުމަން، އިނގިރޭސިވިލާތް، ޖަޕާން، ޕޮލެންޑް، އާޖެންޓީނާ، އިކުއެޑޯ، ކެންޔާ އަދި ސޯމާލިއާގެ ރައީސުންނާއި ބޮޑުވަޒީރުން ހިމެނެ އެވެ. އެމެރިކާގެ ފަރާތުން ވާހަކަ ދެއްކެވީ ނައިބު ރައީސް ކަމާލާ ހެރިސްއެވެ.

ނިއުކްލިއާ ރައްކާތެރިކަމާއި ކާބޯތަކެތީގެ ރައްކާތެރިކަމާއި އަސީރުން ބަދަލުކުރުމުގެ މައްސަލަތަކަށް އަލިއަޅުވާލާ ފައިނަލް ލިޔުމުގައި ސޮއި ނުކުރާ ގައުމުތަކުގެ ތެރޭގައި އިންޑިއާ، މެކްސިކޯ، ސައުދީ އަރަބިއްޔާ، ދެކުނު އެފްރިކާ، ތައިލެންޑް އަދި ޔުނައިޓެޑް އަރަބް އެމިރޭޓްސް ހިމެނެއެވެ. "އޮބްޒާވަރެއް" ކަމަށްވާ ބްރެޒިލުން ސޮއި ނުކުރި ނަމަވެސް ތުރުކީން ވަނީ ސޮއިކޮށްފަ އެވެ. އަދި ޗައިނާއިން މި ކޮންފަރެންސުގައި ބައިވެރިވެފައެއް ނުވެއެވެ.

78 ގައުމަކުން ސޮއިކުރި ފައިނަލް ލިޔުމުގައި ބުނެފައި ވަނީ އދ.ގެ ޗާޓަރާއި ސަރަހައްދީ އެއްބައިވަންތަކަމާއި އިސްތިގުލާލަށް އިހުތިރާމް ކުރުން ... ޔޫކްރެއިންގައި ފުރިހަމަ، އިންސާފުވެރި އަދި ދެމެހެއްޓެނިވި ސުލްހައެއް ގާއިމުކުރުމުގެ އަސާސަކަށް ވެވިދާނެ ކަމަށެވެ. ޔޫކްރެއިންއިން އިތުރު ސަރަހައްދެއް ދޫކޮށްލައި ނޭޓޯގެ އަސްކަރީ އިއްތިހާދުގައި ބައިވެރިވުމުގެ އުއްމީދުތަކުން ދުރަށް ދާން ބޭނުންފުޅުވާ ޕުޓިންއަށް މިއީ ވަރަށް ބޮޑު ނާކާމިޔާބީއެކެވެ.

ސްވިޒަލޭންޑްގެ ރައީސް ވިއޯލާ އަމްހެރޑް ނޫސްވެރިންގެ ބައްދަލުވުމެއްގައި ވިދާޅުވީ ބައިވެރިންގެ "ބޮޑު އަޣުލަބިއްޔަތުން" ފައިނަލް ޑޮކިއުމަންޓަށް އެއްބަސްވެފައިވާ ކަމަށާއި "ޑިޕްލޮމެސީން ހާސިލްކުރެވޭނެ ކަންކަން ދައްކުވައިދޭ" ކަމަށެވެ.  ފޮރިން މިނިސްޓަރު އިގްނާޒިއޯ ކެސިސް ވިދާޅުވީ ސްވިޒަލޭންޑުން ރަޝިޔާގެ ކަމާބެހޭ ފަރާތްތަކާ ވާހަކަ ދައްކާނެ ކަމަށާއި ނަމަވެސް އެ މެސެޖަކީ ކޮބައި ކަމެއް ވިދާޅެއްނުވެއެވެ.

ޔޫކްރެއިންގެ ރައީސް ވޮލޮޑިމިރް ޒެލެންސްކީ ވަނީ މި ބައްދަލުވުމުގައި ސުލްހައަށް އެޅި ފުރަތަމަ ފިޔަވަޅަށް ތައުރީފު ކުރައްވައި، "ދެވަނަ ސުލްހައިގެ ސަމިޓެއް" ބޭއްވުމަށް ހުށަހެޅުއްވި ބައެއް ގައުމުތަކާ އެކު ޔޫކްރެއިން އިން މަޝްވަރާ ކުރަމުން އަންނަ ކަމަށް ވިދާޅުވެފައެވެ.