ދެކުނު ކޮރެއާގެ އަސްކަރިއްޔާއިން ބުނެފައިވާ ގޮތުގައި އަންގާރަ ދުވަހުގެ ވަގުތެއްގައި އުތުރު ކޮރެއާގެ 20 އާއި 30 އާ ދެމެދުގެ އަދަދަކަށް ސިފައިން ދެގައުމުގެ ބޯޑަރު ހުރަސްކުރި ނަމަވެސް އެނބުރި ގޮސްފައިވަނީ ދެކުނު ކޮރެއާގެ ސިފައިން އިންޒާރުގެ ބަޑިޖެހުމުން ކަމަށެވެ.

ޖޮއިންޓް ޗީފްސްއާ ހަވާލާދީ ޔޮންހަޕް ނޫސް އެޖެންސީން ރިޕޯޓްކޮށްފައިވާ ގޮތުގައި މި ހާދިސާ ހިނގާފައިވަނީ ހެނދުނު 8:30 ހާއިރު ޑިމިލިޓަރައިޒްޑް ޒޯން (ޑީއެމްޒެޑް) ގެ މެދުތެރޭގައި ތިބި އުތުރު ކޮރެއާގެ ސިފައިންގެ ގްރޫޕަކުން އަސްކަރީ ސަރަހައްދު ހުރަސްކުރުމުންނެވެ.

ޖޭސީއެސް އިން ބުނީ ދެކުނު ކޮރެއާ ސިފައިން އިންޒާރުގެ ޝޮޓްތަކެއް ފޮނުވާލުމުން އެ ސިފައިން އަވަހަށް އެނބުރި ދިޔަ ކަމަށާއި، އެ މީހުން ގަބޫލުކުރާ ގޮތުގައި އެ ހުރަސްކުރުމަކީ ވިސްނައިގެން ކުރި ކަމެއް ނޫން ކަމަށެވެ. މީގެ ހަފުތާއެއްހާ ދުވަސް ކުރިން ޑީއެމްޒެޑްގެ ސެންޓްރަލް ޒޯނުގައި ވެސް މިފަދަ ހާދިސާއެއް ހިނގާފައިވެއެވެ.

ދެކުނު ކޮރެއާގެ އަސްކަރިއްޔާއިން ބުނީ ބޯޑަރު ސަރަހައްދުގައި ލޭންޑްމައިން ގޮވުމުގެ ސަބަބުން އުތުރު ކޮރެއާގެ ބައެއް ސިފައިންނަށް އަނިޔާވެފައިވާ ނުވަތަ މަރުވެފައިވާ ކަމަށާއި ނަމަވެސް އެ ހާދިސާތައް ހިނގީ ކޮން އިރަކު ކަމެއް ހާމަކޮށްފައެއް ނުވެއެވެ. ކޮރެއާ ޕެނިންސުލާ ހުރަސްކޮށް އޮތް ޑީއެމްޒެޑް އަދި ލައިން އޮފް ކޮންޓްރޯލް އަކީ ދުނިޔޭގެ އެންމެ ބޮޑަށް ބަލަހައްޓާ އަދި މައިން ޖަހާފައިވާ އެއް ބޯޑަރެވެ.

"ފްރަންޓްލައިން ސަރަހައްދުގައި ގިނަ އަދަދެއްގެ ލޭންޑްމައިން ގޮވުމުގެ ސަބަބުން ގިނަ ގެއްލުންތަކެއް ލިބެމުން އެބަދޭ،" ނޫސްވެރިންނާ ވާހަކަ ދައްކަމުން ޖޭސީއެސް އިން ބުންޏެވެ.

ސޯލްއާއެކު 2018 ވަނަ އަހަރު ވެފައިވާ އަސްކަރީ އެއްބަސްވުން ދޫކޮށް އިތުރު ސިފައިންނާއި ސާމާނު ބޯޑަރަށް ބަދަލުކުރާނެ ކަމަށް އުތުރު ކޮރެއާއިން ވަނީ ނޮވެމްބަރު މަހު ބުނެފައެވެ.