އިސްރާއީލާއެކު އޮތް ގުޅުން ނިމުމަކަށް ގެނައުމަށް އިލްތިމާސްކޮށް ބޮޑުވަޒީރަށް ސިޓީ ފޮނުވުމަށް މީހުން އެއްކުރި ސިންގަޕޫރުގެ ތިން އެކްޓިވިސްޓުންގެ މައްޗަށް ދައުވާ އުފުލައިފިއެވެ.

ސިންގަޕޫރުން މުޒާހަރާތައް ހަރުކަށިކޮށް ރެގިއުލޭޓް ކޮށް އެހެން ގައުމުތަކުގެ މައްސަލަތަކަށް ވަކާލާތުކޮށް އާންމު މުޒާހަރާތައް ކުރުމުގެ ހުއްދައެއް ނުދެއެވެ.

ޣައްޒާގައި ހިނގަމުންދާ ހަނގުރާމައަކީ މުސްލިމުންގެ އާބާދީ ބޮޑު އަދި އިސްރާއީލާ ވެސް ގާތް ގުޅުމެއް އޮންނަ ސިންގަޕޫރަށް ނާޒުކު މައްސަލައެކެވެ.

މި މައްސަލައާ ގުޅިގެން މުޒާހަރާތައް ނުކޮށް، އޭގެ ބަދަލުގައި މަޝްވަރާތަކާއި ޑޮނޭޝަން ރެލީތަކުގައި ބައިވެރިވުމަށް ކަމާބެހޭ ފަރާތްތަކުން ވަނީ ސިންގަޕޫރުގެ ރައްޔިތުންނަށް އިލްތިމާސްކޮށްފައެވެ.

އެކަމަކު ހަނގުރާމައާ މެދު ފުން ކަންބޮޑުވުންތަކެއް އުފެދިފައިވާއިރު، ސިންގަޕޫރުގެ ބައެއް މީހުން، ޚާއްސަކޮށް ޒުވާނުން ވަނީ އޮންލައިންކޮށް ޚިޔާލު ފާޅުކުރުމުގައި އަޑުގަދަކޮށް، އަޑު އިއްވޭތޯ މަސައްކަތްކޮށްފައެވެ.

ފެބްރުއަރީ މަހު އެކްޓިވިސްޓުން ވަނީ ސިންގަޕޫރުގެ މައި ޝޮޕިން ސްޓްރީޓް އޯޗާޑް ރޯޑްގައި ހުންނަ މަޝްހޫރު މޯލަކުން ޖެހިގެން ހުންނަ ރިޔާސީ ކޮމްޕައުންޑާ ހަމައަށް ގާތްގަނޑަކަށް 70 ވަރަކަށް މީޓަރު ދިގު ހިނގުމެއްގައި ގޮސްފައެވެ.

ސޯޝަލް މީޑިއާގައި އާންމުކޮށްފައިވާ ފޮޓޯތަކުން ފެންނަ ގޮތުގައި ބައިވެރިން ހިފައިގެން ތިބީ ކަރާ ރަމްޒުކޮށްދޭ ކުޑަތަކެކެވެ. ފަލަސްތީނުގެ ދިދައާ އެއް ކުލަތަކެއް އެކުލެވޭ މި މޭވާ ވަނީ އެއްބައިވަންތަކަމުގެ ރަމްޒަކަށް ވެފައެވެ.

އެ ގްރޫޕުން މަޑުކޮށްލީ ބޮޑުވަޒީރުގެ އޮފީސް ވެސް ހުންނަ ކޮމްޕައުންޑްގެ ގޭޓްތަކުގައެވެ. އަދި 140 ސިޓީގެ ބަންޑެެއްޔެއް މުވައްޒަފުންނާ ހަވާލުކޮށްފައިވެއެވެ.

ކަމާބެހޭ ފަރާތްތަކުން ބުނާ ގޮތުގައި އެކްޓިވިސްޓުން ކަމަށްވާ އަނާމަލައި ކޮކިލާ ޕަރްވާތީ، ސީތީ އަމީރާ މުހައްމަދު އަސްރޯރީ އަދި މޮސައްމަދު ސޮބިކުން ނަހަރު އިންތިޒާމްކޮށްފައި ވަނީ ހުއްދަ ނެތިއެވެ.

ސިންގަޕޫރުގައި ބާއްވާ ހުރިހާ އާންމު މުޒާހަރާތަކަށް ވެސް ފުލުހުންގެ ހުއްދަ ހޯދަން ޖެހޭއިރު، އެހެން ގައުމުތަކުގެ ނުވަތަ ބޭރުގެ ފަރާތްތަކުގެ މައްސަލަތަކަށް ވަކާލާތުކުރާ އާންމު އެއްވުންތަކަށް އެއްވެސް ހުއްދައެއް ނުދޭނެ ކަމަށް ބުނެފައިވެއެވެ.

ކުށް ސާބިތު ވެއްޖެ ނަމަ އެ ތިން އަންހެނުން 10،000 ސިންގަޕޫރު ޑޮލަރު (7،300 ޑޮލަރު ) އާ ހަމައަށް ޖޫރިމަނާކުރުން ނުވަތަ ހަ މަސް ދުވަހުގެ މުއްދަތަށް ޖަލަށް ލެވޭނެއެވެ.

ބުރާސްފަތި ދުވަހު އެމީހުން ކަފާލާތުގެ ދަށުން ދޫކޮށްލިއިރު، އެމީހުންގެ ހެދުމުން ޣައްޒާ ކަންތަކުގައި ދޫނުދޭނެ ކަން އަންގައިދިނެވެ. އަމީރާ ލައިގެން ހުރީ ފަލަސްތީނުގެ އެކްޓިވިޒަމްގެ ރަމްޒަކަށް ވެފައިވާ ސަގާފީ އަރަބި ޝޯލެއް ކަމަށްވާ ކޫފިއްޔަ އާއި ވައްތަރު ޝޯލެކެވެ. އަނާމަލައި ލައިގެން ހުރީ "ޖަސްޓިސް ނައު!" ޖަހާފައިވާ ހެދުމެކެވެ.