ޕެނަމާ ޕޭޕަރސް އާއި އޮޕަރޭޝަން 'ކާ ވޮޝް'ގެ މައްސަލަތަކާ ގުޅުން ހުރި މައްސަލަތަކުގައި މަނީ ލޯންޑަރިންގެ ދައުވާ އުފުލާފައިވާ 28 މީހަކު ޕެނަމާގެ ކޯޓަކުން ކުށް ސާބިތުނުވާ ކަމަށް ކަނޑައަޅައިފިއެވެ.

ގާޒީ ބަލޮއިސާ މާކިނޭޒް އަމުރު ކުރެއްވީ ދައުވާ ލިބޭ ފަރާތްތަކާ މެދު އަޅާފައިވާ ހުރިހާ ފިޔަވަޅުތަކެއް އުވާލުމަށެވެ. އަދި އެ މައްސަަލައިގެ ތެރޭގައި އެ ގްރޫޕްގެ ތެރެއިން އެކަކު މަރުވެފައިވާ ކަމަށް ވެސް އޭނާ ވިދާޅުވި އެވެ. މި މީހުންގެ ވަނަވަރު ވަނީ ސިއްރުކޮށްފަ އެވެ.

ޕެނަމާ ޕޭޕަރސް އަކީ 2016 ވަނަ އަހަރު އިންޓަނޭޝަނަލް ކޮންސޯޓިއަމް އޮފް އިންވެސްޓިގޭޓިވް ޖާނަލިސްޓު (އައިސީއައިޖޭ) އިން ޝާއިއުކުރި 11 މިލިއަނަށް ވުރެ ގިނަ ލީކުވި ލިޔެކިޔުންތަކެކެވެ.

އެ ކަރުދާސްތަކުގައި ދުނިޔޭގެ މިހާރުގެ ނުވަތަ ކުރީގެ 12 ލީޑަރުންގެ އިތުރުން އެހެން 128 ސިޔާސީ ބޭފުޅުންނާއި އާންމު އޮފިޝަލުންނަށް އިޝާރާތްކޮށްފައިވެ އެވެ.

ކޯޓުގެ ބަޔާނެއްގައި ބުނެފައި ވަނީ މައްސަލައިގައި އެއްކުރި ހެކިތައް ޑިއު ޕްރޮސެސްއަށް ނުފެތޭތީ، އެ މައްސަލައިގެ "ސައްހަކަމާއި ނަޒާހަތްތެރިކަމާމެދު" ޝައްކު އުފެދިފައިވާކަމަށެވެ.