ފްރާންސްގެ އިރުއުތުރުގައި ތުރުކީ ކައިވެންޏެއްގައި ބަޑިޖަހައި އުމުރުން 30 އަހަރުގެ މީހަކު މަރުވެ އެތައް ބަޔަކު ޒަޚަމްވެއްޖެ ކަމަށް ފުލުހުން ބުނެފިއެވެ.

ފްރާންސްގެ މީޑިއާތަކުން ރިޕޯޓްކުރާ ގޮތުގައި ހޮނިހިރު ދުވަހުގެ ރޭ ދަންވަރު ތިއޮންވިލްގައި ހުންނަ ރިސެޕްޝަން ވެނިއުއަށް ހަތިޔާރު އެޅި، ހޫޑް އަޅައިގެން ތިބި ތިން މީހަކު އައިސް މެހެމާނުންނަށް ބަޑިޖަހާފައިވެ އެވެ.

ފުލުހުންގެ މަސްދަރުތަކާ ހަވާލާދީ ލެ ފިގާރޯ ނޫހުން ބުނާ ގޮތުގައި ހަމަލާދިން މީހުން އައީ "މޮސެލްގެ މަޝްހޫރު ގޭންގުތަކުގެ މެދުގައި ހުރި ހަމަނުޖެހުންތަކާ ގުޅިގެން" ކަމަށެވެ.

ޒަޚަމްވި މީހުންގެ ތެރޭގައި މާބަނޑު އަންހެނަކު ހިމެނޭ ކަމަށް ފުލުހުން ބުނިއިރު، ޒަހަމްވި މީހުންގެ ތެރެއިން ތިން މީހުންގެ ހާލު ސީރިއަސް ކަމަށް ރިޕޯޓްތައް ބުނެއެވެ.

ޖަރުމަނާއި ލަގްޒެމްބާގްގެ ބޯޑަރު ކައިރީގައި އޮންނަ ލޮރޭން ސަރަހައްދުގައި ހަތިޔާރު އެޅި މީހުން ކާރުގައި އެ ހަރަކާތަށް ދިޔައިރު، ކައިވެނި ހަފްލާގައި 100 އެއްހާ މީހުން އުފާފާޅު ކުރަމުން ދިޔަ ކަމަށް ފްރާންސްގެ މީޑިއާތަކުން ބުނެއެވެ.