އިންޑިއާގެ އުތުރުގައި ބޭއްވި ހިންދޫ އަޅުކަމެއްގައި ފިތި ބާރު ވެގެން 100 އަށް ވުރެ ގިނަ މީހުން މަރުވެފައިވާ ކަމަށް އޮފިޝަލުން ބުނެފިއެވެ.

މި ހާދިސާ ހިނގާފައިވަނީ އުއްތަރު ޕްރަދޭޝް ސްޓޭޓްގެ ހަތްރަސް ޑިސްޓްރިކްޓްގައި ބޭއްވި ސަޓްސަންގް (ހިންދޫ ދީނީ ހަރަކާތެއް) ގައެވެ.

ގިނަ އަދަދެއްގެ އަންހެނުންނާއި ބައެއް ކުޑަކުދިން ހިމެނޭ ގޮތަށް ޝިކާރައަކަށް ވެފައިވާ މީހުން މިހާރު ވެސް ދަނީ ދެނެގަނެމުންނެވެ.

އުއްތަރު ޕްރަދޭޝްގެ ފުލުހުންގެ އިސް އޮފިސަރެއްގެ ތަރުޖަމާނަކު ބީބީސީއަށް ބުނެފައިވަނީ "މަރުވި މީހުންގެ ފައިނަލް އަދަދު އާންމު ކުރަން ގަޑިތަކެއް ނަގާނެ" ކަމަށާއި ނަމަވެސް މަދުވެގެން 100 މީހުން މަރުވެފައިވާކަން ކަށަވަރުކޮށްދީފައިވާ ކަމަށެވެ.

މަންޒަރު ދުށް މީހަކު ބީބީސީއަށް ބުނީ ހުރިހާ ކަމެއް "ރަނގަޅަށް" ކުރިއަށްދާ ކަމަށާއި، "ކުއްލިއަކަށް ހަޅޭއްލަވައިގަތުމުގެ އަޑު އިވި، އެނގުމުގެ ކުރިން މީހުން އެކަކު އަނެކަކަށް ވެއްޓިގެން ދިޔައީ" ކަމަށެވެ.

އޮންލައިން ކޮށް ދައުރުވާ ބައެއް ވީޑިއޯތަކުން ބިންމަތީގައި މަރުވެފައި ގިނަ އަދަދެއްގެ މީހުން ތިބި މަންޒަރު ފެނިގެންދެއެވެ.