އިސްރާއީލާއި ޣައްޒާ ހަނގުރާމައާ ބެހޭ ސިޔާސަތާ ގުޅިގެން އިސްތިއުފާ ދިން ބައިޑަންގެ ވެރިކަމުގެ ކުރީގެ 12 އޮފިޝަލަކު ވިދާޅުވަނީ ސަރުކާރުގެ އަމަލުތަކުގެ ސަބަބުން އެމެރިކާގެ ގައުމީ ސަލާމަތަށް ނުރައްކާވެފައިވާ ކަމަށެވެ.

އެ ސިޔާސަތުތަކުގެ ސަބަބުން ސަރަހައްދު އިތުރަށް ނުތަނަވަސްވެ، އެމެރިކާ އަމާޒަކަށް ވެފައިވާ ކަމަށް އެމީހުން ގުޅިގެން ނެރުނު ބަޔާނެއްގައި ބުނެއެވެ.

އެ 12 މީހުންގެ ތެރެއިން އެކަކު އެމެރިކާގެ ޑިޕާޓްމަންޓް އޮފް އިންޓީރިއާ އިން އިސްތިއުފާ ދެއްވީ އަންގާރަ ދުވަހުއެވެ.

އެމެރިކާގެ ޚާރިޖީ ވުޒާރާއިން މީގެ ކުރިންވެސް މިފަދަ ވާހަކަތައް ދޮގުކޮށް، ޣައްޒާގައި އާންމުންގެ ފުރާނަ ގެއްލިފައިވާ ކަމަށް ބުނެ ފާޑުކިޔުމާއި އިންސާނީ އެހީ އިތުރުކުރުމަށް ކުރަމުންދާ މަސައްކަތްތަކަށް އިޝާރާތްކޮށްފައިވެއެވެ.

ކުރީގެ އޮފިޝަލުން ގުޅިގެން ނެރުނު ބަޔާނެއްގައި ބުނެފައި ވަނީ، އިސްރާއީލަށް އެމެރިކާއިން ދޭ ޑިޕްލޮމެޓިކް ކަވަރުގެ ސަބަބުން، ޣައްޒާގައި ވަށާލާފައިވާ ފަލަސްތީނުގެ އާބާދީއެއް މަރާލުމާއި ބަނޑުހައިހޫނުކަމުގެ ޝިކާރައަކަށްވުމުގައި ދެބަސްވެވެން ނެތް ބައިވެރިވުމެއް އޮތްކަން ކަށަވަރުވެފައިވާ ކަމަށެވެ.

"އަޅުގަނޑުމެންގެ ގައުމުގެ ސިޔާސީ އަދި އިގްތިސާދީ މަސްލަހަތަށް ވެސް މުޅި ސަރަހައްދުގައި ބޮޑެތި ގެއްލުންތަކެއް ލިބިފައިވާއިރު، ދުނިޔޭގެ އިތުބާރު ސްޓްރެޓެޖިކް ވާދަވެރިކަމުގެ އާ ޒަމާނެއް ފާހަގަކުރެވޭ ދުވަސްވަރެއްގައި ދުނިޔޭގެ އިތުބާރު ވަރަށް ބޮޑަށް ގެއްލިއްޖެ،" ބަޔާނުގައިވެ އެވެ.

ވައިޓް ހައުސްގެ ކުރީގެ އޮފިޝަލަކާއި އެއާފޯސް ޑިޕާޓްމަންޓުގެ ކުރީގެ ދެ މުވައްޒަފުންނާއި ޑިފެންސް އިންޓެލިޖެންސް އެޖެންސީގައި ސިފައިންގެ ކުރީގެ އޮފިސަރަކު ވެސް ވަނީ އެ ބަޔާނުގައި ސޮއިކޮށްފަ އެވެ.