ހދ.ކުޅުދުއްފުށިން ފައިލޭރިޔާގެ ވޭދަނަތަކެއް ފެންމަތިވެގެން މިހާތަނަށް އެރަށުން 700 އަށްވުރެ ގިނަ ސުންކު ނަގާފައިވާ ކަމަށާއި އެފަހުން އިތުރު ވޭދަނައެއް ފެނިފައިވާ ނުވާކަމަށް ކުޅުދުއްފުށީ ހޮސްޕިޓަލުން ބުނެފިއެވެ.

ކުޅުދުއްފުށީ ރީޖަނަލް ހޮސްޕިޓަލް ހިންގުމާ ވަގުތީ ގޮތުން ހަވާލުވެހުންނެވި، ފައިނޭންސް އެގްޒެކެޓިވް މުހައްމަދު މޫސާ ބުނި ގޮތުގައި އެރަށުން ގިނަ އަދަދެއްގެ ސުންކު މިހާރު ނަގާފައިވާ ކަމަށާއި އެއްވެސް ސުންކެއް ފައިލޭރިޔާއަށް ފައްސިވެފައިނުވެއެވެ.

ސުންކު ނެގުމުގެ މަސައްކަތް މިވަގުތު ހުއްޓާލާފައިވާ ކަމަށާއި އެޗްޕީއޭއިން ޓީމްތަކެއް އެކުލަވާލައިގެން މުޅި ރާއްޖޭގައި ފައިލޭރިޔާ ޓެސްޓުތަކެއް ކުރިޔަށް ގެންދިޔުމަށް ސެންޓްރަލް ސެޓަޕްތަކެއް ހެދުމުގެ މަސައްކަތް ކުރިއަށްދާ ކަމަށްވެސް އޭނާ ވަނީ ބުނެފައެވެ.

އޭގެއިތުރުން މިވަގުތު ފައިލޭރިޔާ ޖެހިފައިތިބި މީހުންނަށް ބޭސްފަރުވާ ކުރިޔަށްދާ ކަމަށްވެސް އޭނާ ވަނީ ފާހަގަކުރައްވާފައެވެ.

މިކަމާއި ގުޅިގެން އެޗްޕީއޭއިން ވަނީ ފައިލޭރިޔާއަށް މިހާރު ނޭޝަނަލް ލެވެލްގައި ކުރެވެމުންދާ މަސައްކަތްތަކުގެ ތަފްސީލް އަންނަ ބުރާސްފަތި ދުވަހު ހާމަކުރާނެ ކަމަށް ބުނެފައެވެ.

މިހާތަނަށް ކުޅުދުއްފުށިން ވަނީ ފައިލޭރިޔާގެ 25 ވޭދަނަ ފެނިފައެވެ.

މިދިޔަމަހު މާލެ ސަރަހައްދުގައި ކުރިއަށް ގެންދިޔަ ސްކްރީނިންގައި ވެސް ހަތް ވޭދަނަ ފެނިފައިވެއެވެ.ފައްސިވެފައިވާ ހުރިހާ ފަރާތްތަކަކީވެސް ރާއްޖޭގައި މަސައްކަތްކުރާ ބިދޭސީންކަން ފާހަގަކޮށްލެވެއެވެ.

ރާއްޖެއިން ނައްތާލެވިފައިވާ ފައިލޭރިޔާގެ ކޭސްތަކެއް އަލުން ރާއްޖޭއިން ފެންމަތިވުމާއި ގުޅިގެން އެޗްޕީއޭއިން ދަނީ ސްކްރީނިންގް ޕްރޮގްރާމްތަކެއް ކުރިޔަށް ގެންދަމުންނެވެ.