ދުވަސްކޮޅަކަށް ފަހު އަނެއްކާވެސް ފައިލޭރިއާގެ ވޭދަނަތަކެއް ފެނިއްޖެއެވެ.

މިފަހަރު ވޭދަނަތައް ފެނިފައިވަނީ ގއ. ކޫއްޑޫއިންނެވެ. އެގޮތުން ފެލިވަރުގައި މަސްކަތްކުރާ ބިދޭސީއެއްގެ ފަރާތުން ހުމުގެ ބައެއް އަލާމާތްތައް ފެނުމުން އޭނާ ޓެސްޓު ހެދުމަށް ފަހު އޭނާ ބައްޔަށް ނެގަޓިވްވެ އެޗްޕީއޭއިން ދިން އިރުޝާދުގެ ދަށުން މިފްކޯއިން ކުރި ސްކްރީނިންގެ ތެރެއިން ކޫއްޑޫގައި ހުންނަ މިފްކޯ ސައިޓުގައި މަސައްކަތްކުރާ 3 ބިދޭސީންވަނީ ފައިލޭރިއާއަށް ޕޮޒިޓިވްވެފައެވެ.

އެ ބިދޭސީންނަކީ އިންޑިއާގެ އުއްތަރުޕްރަދޭޝަށް ނިސްބަތްވާ ތިން ބިދޭސީންނެވެ.

ބަލި ދެނެގަނެވުމާއެކު ބިދޭސީންނަށް ފަރުވާ ދިނުމުގެ މަސައްކަތް މިދިޔަ ބުރާސްފަތި ދުވަހުން ފެށިގެން ކުރިއަށްދާއިރު، މިހާރު އެ ތިން މީހުންގެ ހާލު ވެސް ސްޓޭބަލްކަމަށް މައުލޫމާތު ވަނީ ލިބިފައެވެ.

މިކަމާ ގުޅިގެން ތޭރަ އޮންލައިންއަށް މައުލޫމާތު ދެމުން މިފްކޯގެ ޑީއެމްޑީ އިބްރާހިމް ސައީދު ވިދާޅުވީ، އެޗްޕީއޭގެ ގައިޑްލައިންތަކާ އެއްގޮތަށް މިހާރު ހުރިހާ ދިމާއެއްގައި ވެސް ސްކްރީނިން ބިދޭސީ މުވައްޒަފުންގެ ކުރިއަށް ގެންދާ ކަމަށާ އެކަން އެޗްޕީއޭއާ ގުޅިގެން ކުރިއަށް ތަނުގައިވެސް ކުރިއަށް ގެންދާނެ ކަމަށެވެ.

އިބްރާހިމް ސައީދު އިތުރަށް ވިދާޅުވީ، ޕޮޒިޓިްވި ތިން ބިދޭސީއިންނަކީ މިދިޔަ އަހަރުގެ ސެޕްޓެމްބަރު މަހުން ފެށިގެން މިފްކޯގައި މަސައްކަތްކުރަމުން އަންނަ ތިން ބިދޭސީއިން ކަމަށެވެ.

ތިން މީހަކު ޕޮޒިޓިވްވި ނަމަވެސް ކޫއްޑޫގެ އޮޕަރޭޝަނަށް އެއްވެސް އަސަރެއް ނުކުރާނެ ކަމަށް އޭނާ ފާހަގަކުރެއްވިއެވެ.

ކޫއްޑޫގައި 395 ބިދޭސީން މަސައްކަތް ކުރެއެވެ.