ރައީސުލްޖުމްހޫރިއްޔާ ޑރ،މުހައްމަދު މުއިއްޒު ވެރިކަމަށް އާދެވުމުން އެމަނިކުފާނު އެމަގާމަށް ގެނެސްދެއްވި ބޭފުޅާ، ރައީސް އަބްދުﷲ ޔާމީން އަބްދުލް ޤައްޔޫމްގެ ފޮޓޯފުޅު އަދި ގޮނޑީކޮޅު މަތިން ހަނދާން ނައްތާލީ ކަމަށް ރައީސް ޔާމީންގެ އައު ސިޔާސީ ޕާޓީ، ޕީޕަލްސް ނެޝަނަލް ފްރަންޓް، (ޕީއެންއެފް) ގެ ފަރާތުން ރައްޔިތުންގެ މަޖިލީހަށް ވާދަކުރައްވާ ކުރައްވާ ކެންޑިޑޭޓް، ހަލީމަތު ޒުހައިރާ ވިދާޅުވެއްޖެއެވެ.

ހަލީމަތު މިފަދައިން ވިދާޅުވީ، ޗެނަލް 13 ގެ ލައިވެ ޕްރޮގްރާމެއްގައި ވާހަކަދައްކަވަމުންނެވެ.

އެގޮތުން ހަލީމަތު ވިދާޅުވީ، ރައީސް ޔާމީން އެންޑޯސްކުރައްވައިގެން އެމަނިކުފާނުގެ ފޮޓޯފުޅާއި ހުސް ގޮނޑި ވިއްކައިގެން ވެރިކަމަށް އައިސް، ރައީސް ޑރ.މުއިއްޒު، ރައީސް ޔާމީން މަތިން ހަނދާން ނައްތާލައިފި ކަމަށެވެ.

އިތުރަށް ހަލީމަތު ވިދާޅުވީ، މި ސަރުކާރުގައި މިހާރު ތިއްބެވި ބޭފުޅުން އަމަލު ކުރަމުން އެދަނީ، އޭރު މަގުމަީގައި ތިއްބަވައިގެން ދެއްކި ވާހަކަތަކާއި މުޅިން ޚިލާފަށް ކަމަށެވެ.

މަގާމުގެ ނުފޫޒާއި ބާރުގެ ބޭނުންކޮށްގެން ސަރުކާރުގެ މަގާމްތަކުގައި ތިބި މުވައްޒަފުން، މިސަރުކާރުން ކޮންޓްރޯލް ކުރަމުން އަންނަ ކަމަށްވެސް ހަލީމަތު ވަނީ ތުހުމަތުކޮށްފައެވެ.

މިފަދައިން ހަލީމަތު ފާހަގަކުރައްވާފައިވާއިރު، މިހާރު ސަރުކާރުގެ އިސް ފަޑި ތަކުގައި ތިއްބެވި ބޭފުޅުންނަކީ ކުރީ، ރައީސް ޔާމީންގެ ފަހަތްޕުޅުގައި އަބަދުވެސް ރައީސް ޔާމީންގެ ފިކުރު ދިރުވުމަށް މަސައްކަތް ކުރައްވާނެ ކަމަށް ކެނޑިނޭޅި އަޑުއުފުލަމުން އައި ބައެއްކަން ފާހަގަކޮށްލެވެއެވެ.