އައްޑޫގެ ސިޓީއިން އެކި ގަޑިތަކުގައި ކަރަންޓު ކަނޑަމުން ގެންދާތީ އެކަމާ ކަންބޮޑުވުން ފާޅުކޮށް ރައްޔިތުންގެ މަޖިލީހަށް މިއަދު ކުއްލި މައްސަލައެއް ހުށަހަަޅައިފިއެވެ.

މައްސަލަ ހުށަހެޅީ ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލުއެވެ.

ނާޒިލް ހުށަހެޅުއްވި މައްސަލާގައި ވިދާޅުވީ އައްޑޫގެ ރައްޔިތުންނަށް އެންމެ އަސާސީ މިންވަރަށް ވެސް ކަރަންޓުގެ ހިދުމަތް ލިބެމުން ނުދާ ކަމަށެވެ. އެއީ ސަރުކާރުން އައްޑުއަށް ވާ އިހުމާލެއް ކަމަށް ވެސް ކުއްލި މައްސަލާގައި އޭނާ ވިދާޅުވިއެވެ.

ނާޒިލު ހުށަހެޅުއްވި ކުއްލި މައްސަލަ މަޖިލީހުގެ މިއަދުގެ ޖަލްސާއަށް ބަލައިގަތެވެ. އެ މައްސަލަ ބަލައިގަތީ އެކަމަށް ނެގި ވޯޓުގައި ބައިވެރިވެވަަޑައިގެންނެވި 57 މެންބަރުންގެ އިއްތިފާގުންނެވެ.

އެ މައްސަލަ ބަލައިގަނެ މަޖިލީހުގައި ކުރި ބަހުސްގެ ފުރަތަމަ ފުރުސަތުގައި ނާޒިލު ވިދާޅުވީ އައްޑޫގެ ކަރަންޓުގެ ހިދުމަތަށް އެހާ ބޮޑަށް ބުރޫ އަރަން ދިމާވި އެއް ސަބަބަކީ ފެނަކައިގެ މާލޭ އޮފީހުގައި ތިބި އިސް ބޭފުޅުންގެ އިހުމާލުވުން ކަމަށެވެ. އެގޮތުން އޭނާ ތުހުމަތުކުރެއްވި ގޮތުގައި އައްޑޫގެ ކަރަންޓްގެ ހިދުމަތް ރަނގަޅަށް ދޭން ބޭނުންވާ ސްޕެއާޕާޓްސް ގަވައިދުން ނުފޮނުވާތާ ހަތް މަސް ދުވަސް ވެއްޖެ އެވެ.

އޭނާ ވިދާޅުވީ އައްޑޫގެ ފެނުގެ ހިދުމަތަށް ވެސް މިދިޔަ މަހު ހަމަ އެފަދަ މައްސަލަތައް ދިމާވި ކަމަށެވެ.

މީގެ އިތުުރުން އައްޑޫ ސިޓީގައި "ނިވިދިއްލޭ ބޮތްކެއް" ފަދައިން ކަރަންޓު ކެނޑެމުންދާތީ އެކަމުގެ އުނދަގޫތައް ރައްޔިތުންނަށް ވަރަށް ބޮޑަށް ކުރިމަތިވެފައިވާ ކަމަށް އެ ކުއްލި މައްސަލައިގައި ނާޒިލް ފާހަގަކުރައްވާފައިވެއެވެ. އަދި، މި ސަރުކާރަށް ހަ މަސްވީއިރު ވެސް އެކަން ހައްލުކުރުމަށް މާ ބޮޑު މަސައްކަތެއް ކޮށްފައިނުވާ ކަމަށާއި އެ ކަމުގައި ސަރުކާރުގެ އިހުމާލު އެބައޮތް ކަމަށް ނާޒިލް ވިދާޅުވެފައިވެއެވެ.

އެ ގޮތުން، މިހާރު އައްޑޫ ރައްޔިތުން ތިބީ ފަލަސްތީނު ރައްޔިތުން ތިބި ހާލަތުގައި ކަމަށް ނާޒިލް ވަނީ ވިދާޅުވެފައެވެ.