ރައްޔިތުންގެ މަޖިލީހުގެ އިންތިހާބާއި ރިޔާސީ އިންތިހާބު އެއްކޮށްލައި، މިހާރު ހިނގަމުންދާ މަޖިލީހުގެ ދައުރު ކުރު ކުރުމަށް ގާނޫނުއަސާސީ ބަދަލުކުރުމަށް ސަރުކާރުގެ ފަރާތުން މަޖިލީހަށް ހުށަހެޅި ބިލު މަޖިލީހުން މިއަދު ފާސްކޮށްފިއެވެ.
މިއަދު ނެގި ވޯޓުގައި އެ ބިލު ފާސްކުރީ 72 މެންބަރުންގެ ވޯޓާއެކުއެވެ. މަޖިލީހުގެ ރައީސް އަބްދުއްރަހީމް އަބްދުﷲ ވެސް އެ ވޯޓުގައި ބައިވެރިވިއެވެ.
އެ ބިލާ ދެކޮޅަށް ވޯޓު ދިނީ އެންމެ މެންބަރެކެވެ. އެއީ އައްޑޫ މީދޫ ދާއިރާގެ މެންބަރު އަބްދުއްރަހުމާނެވެ.
މި ބިލް ފާސްކުރަން އުޅޭތީ އިދިކޮޅު އެމްޑީޕީގެ މަޖިލިސް މެންބަރުން ވަނީ މަޖިލީހުގެ ތަޅުމުގައި އިހްތިޖާޖުކޮށްފަ އެވެ. އިހްތިޖާޖުކުރުމުން ރިޔާސަތުން ވަނީ ނަން އިއްވައި އެ މެންބަރުން މަޖިލީހުގެ ތަޅުމުން ނެރެފައެވެ.
އެމްޑީޕީގެ މެންބަރުން ތުހުމަތުކުރާގޮތުގައި މިއީ ރައްޔިތުންގެ ބާރު ކަނޑުވާލައި ރައީސް މުހައްމަދު މުއިއްޒު ވެރިކަމުގައި ގިނަ ދުވަހު ހުންނެވުމުގެ ގޮތުން ކުރަން އުޅޭ ކަމެކެވެ.
ދެ އިންތިހާބު އެއްކޮށްލަން ފެންނަ ނުފެންނަ ވޯޓަކަށް އަންނަ ކައުންސިލް އިންތިހާބު އޮންނަ ދުވަހަކު ވޯޓު ނަގާނެ ކަމަށް ގިނަ ބަޔަކު ބުނަމުންދާއިރު މިއީ ބިރުވެރި ނުރައްކާތެރިކަމެއްގެ ގޮތުގައިވެސް ސިފަކުރަމުންދެއެވެ. އެގޮތުން މިއީ ސަރުކާރު ޖަވާބުދާރީ ކުރުވުމުގެ ފުރުސަތު ގެއްލުވާލުމަށް ހިންގަން އުޅޭ ޖަރީމާއެއްގެ ގޮތުގައި މަސްރަހު ދިރާސާ ކުރާ މީހުން ބުނެއެވެ.
