ހަގީގީ މިނިވަންކަން އޮތީ އަދިވެސް ކަރުދާހުގައި ކަމަށް ޕީއެންއެފްގެ ސެކެޓްރީ ޖެނެރަލް މުހައްމަދު މަލީހް ޖަމާލް ވިދާޅުވެއްޖެއެވެ.
މަލީހް މިފަދައިން ވިދާޅުވީ އެކްސްގައި ކުރެއްވި ޕޯސްޓެއްގައެވެ.
އެގޮތުން މަލީހް ވަނީ ޕޯސްޓްގައި އެންމެ ފުރަތަމަކަމަކަށް 59 ވަނަ މިނިވަން ދުވަހުގެ ތަހުނިޔާ އަރިސްކުރައްވާފައެވެ.
ހަޤީޤީ މިިނިވަންކަން އަދިވެސް އޮތީ ކަރުދާހުގައި ކަމަށާއި ވެރިމީހާ ދިން މިންވަރެއްގައި ހިފެހެއްޓިފައި ކަމަށް ވެސް މަލީހް ވަނީ ވިދާޅުވެފައެވެ.
މިނިވަން ޝަރީއަތެއް ނުލިބޭކަމަށާއި ވަޒީފާގެ މިނިވަންކަމެއް ވެސް މިއަދު ނެތް ކަމަށް މަލީހް ޕޯސްޓްގައި ފާހަގަކުރެއްވިއެވެ.
އޭގެއިތުރުން މަލީހް ވިދާޅުވީ މިނިވަން ނޫސްވެރިކަމެއް ވެސް މިއަދު ރާއްޖޭގައި ނެތްކަމަށެވެ.
ކުރީ ސަރުކާރުގެ ސިއްރު ސިޓީފުޅަކުން ވިއްކާލި ކަނޑު އަދިވެސް ހޯދިފައިނުވާކަމަށާއި ދަރަނި ނުދެއްކޭ މިންވަރަށް ނަގާފައިވާކަމަށް ވިދާޅުވެ މަލީހްގެ ފާޑުކިޔުން ސަރުކާރަށް ވަނީ އަމާޒުކޮށްފައެވެ.
59 ވަނަ މިނިވަން ދުވަސް އައި އިރު ރާއްޖޭގެ މިނިވަންކަން އިހުސާސް ނުކުރެވޭ ވާހަކައަކީ ހުރިހާ އެންމެން ގޮތަކަށް ވެސް މީސްމީޑިޔާގައި ދައްކާ ވާހަކައެއްކަން ފާހަގަކޮށްލެވެއެވެ.
