ޣައްޒާގެ އަލް ތާބިން ސްކޫލަށް ސަހްޔޫނީންދިން ހަމަލާގައި 100 އަށްވުރެ ގިނަ މީހުން ޝަހިދުވުމުން އެކަން ކުށްވެރިކުރައްވާ، ޣައްޒާގައި ހިންގަނީ "ހަނގުރާމަ" އެއް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ސޯޝަލް މީޑިއާގައި ކުރެއްވި ޕޯސްޓެއްގައެވެ.

މިއަދު ހެނދުނުގެ ވަގުތެއްގައި ކުރެއްވި އެ ޕޯސްޓުގައި ރައީސް ވިދާޅުވީ، އިޒްރޭލުން އަނެއްކާވެސް ޣައްޒާގެ ސްކޫލަކަށް އަމާޒުކޮށް ދިން ހަމަލާ ކުށްވެރިކުރައްވާ ކަމަށެވެ. އަދި، އަލް ތާބީން ސްކޫލަށް ދިން ހަމަލާގައި ކުޑަކުދިންނާއި އަންހެނުން ޝަހީދުކޮށް، ޒަހަމުކޮށްލާފައިވާ މަންޒަރުތަކަކީ ބިރުވެރި މަންޒަރުތަކެއްގެ ގޮތުގައި އެމަނިކުފާނު ސިފަކުރައްވާފައިވެއެވެ.

ނަމަވެސް އެހުރިހާކަމެއް ރައީސް ސިފަކުރެއްވީ ހަނގުރާމައެއްގެ ގޮތުގައެވެ. އެގޮތުން ޣައްޒާގައި ހިނގަނީ ހަނގުރާމައެއް ކަމަށް ވިދާޅުވެފައެވެ.

މީގެ އިތުރުން ހަނގުރާމާގައި ފަލަސްތީނުގެ މައުސޫމު 39،000 އާންމުން ޝަހީދުވެފަިއވާ ކަމަށާ ނަމަވެސް އިޒްރޭލުން ހަނގުރާމަ ހުއްޓާނުލާކަން ފާހަގަކުރައްވާފައިވެއެވެ.

ސްކޫލަށް ބޮން އެޅުމަކީ ބައިނަލްއަގުވާމީ އިންސާނީ ހައްގުތަކާ ބެހޭ ގާނޫނުތަކާ ކަނޑައެޅިގެން ހިލާފު އަމަލުތަކެއް ކަމަށާއި އިޒްރޭލުގެ އަމަލުތައް ހުއްޓުވަން ބައިނަލްއަގުވާމީ މުޖުތަމައުން އަވަސް ފިޔަވަޅުތަކެއް އަޅަން ޖެހޭ ކަމަށް ވެސް ރައީސް ވިދާޅުވިއެވެ.

ފަލަސްތީނު ރައްޔިތުންނާ ދެކޮޅަށް އިޒްރޭލުން ހިންގަނީ "ނަސްލުހޭދު" އެއް ނުވަތަ "ޖެނޮސައިޑް" އެއް ކަމަށް އދ. އިން ވެސް އެއްބަސްވާއިރު ރައީސް މުއިއްޒު މުޅި ޕޯސްޓުގައި ބެސް އިޒްރޭލުން ހިންގަމުންދާ ލާއިންސާނީ އަމަލުތަކަކީ "ނަސްލުހޭދަ" ނުވަތަ ޖެނޮސައިޑެއްގެ ގޮތުގައި ސިފަކުރައްވާފައިނުވެއެވެ.

މިކަމާ ގުޅިގެން ގިނަ ބައެއްގެ ފާޑުކިޔުން އަމާޒުކޮށްފައިވެއެވެ. ރައީސް މުއިއްޒު ވަނީ އެމެރިކާއަށް ބިރުން. "ނަސްލުހޭދަ" މި ލަފްޒު ބޭނުންކުރުން މަނާކޮށް އެކަން ސަރުކާރުގެ އިދާރާތަކަށްވެސް އަންގާފައިކަމަށް މީގެ ކުރިން މައުލޫމާތު ލިބިފައިވެއެވެ.