އިސްރާއީލުގެ ޖަލުތަކުގައި ހައްޔަރުކޮށްގެން ގެންގުޅޭ ފަލަސްތީނުގެ ރައްޔިތުން މަރުވާ ކަމަށް އިސްރާއީލުގެ އަސްކަރިއްޔާއިން އެއްބަސްވެއްޖެއެވެ.
އިސްރާއީލުގެ އަސްކަރިއްޔާއާއި ހަވާލާދީ، "އެސޯސިއޭޓެޑް ޕްރެސް" އިން ރިޕޯޓް ކޮށްފައިވާ ގޮތުގައި މިދިޔަ އޮކްޓޯބަރު މަހުން ފެށިގެން މިހާތަނަށް އިސްރާއީލުން ބަންދުގައި ގެންގުޅުނު ފަލަސްތީނުގެ 36 މީހުން ވަނީ މަރުވެފައެވެ.
އިސްރާއީލް ސިފައިން ބުނީ، ބައެއް ގައިދީންނަކީ ޖަލަށް ގެންދިއުމުގެ ކުރިން ވެސް ކޮންމެ ވެސް ކަހަލަ ބައްޔެއް ޖެހިފައި ތިބި މީހުން ކަމަށާއި ބައެއް މީހުންނަށް އަނިޔާވެފައިވަނީ މިހާރު ހިނގަމުންދާ ހަމަނުޖެހުންތަކުގެ ސަބަބުން ކަމަށެވެ. ނަމަވެސް އެކަމުގެ ތަފްސީލެއް ހާމަކޮށްފައެއް ނުވެއެވެ.
އިސްރާއީލް ޖަލުތަކުގައި މަރުވި މީހުންގެ ތެރެއިން ފަސް މީހެއްގެ އޮޓޮޕްސީ ރިޕޯޓުގެ ވާހަކަ އާންމުކޮށްފައިވާއިރު، އޭގެ ތެރެއިން ދެ މީހެއްގެ ގައިގައި ޖިސްމާނީ އަނިޔާގެ އަލާމާތްތައް ހުރި ކަމަށް ވަނީ ބުނެފައެވެ. އެގޮތުން މޭކަށިތައް ބިންދައިގެން ދިއުން ހިމެނެއެވެ. އެފަދަ ގޮތަކަށް މަރުވެފައިވާ މީހަކާއި ގުޅިގެން ރިޕޯޓްތަކުން ބުނީ، އެފަދަ އަނިޔާތަކެއް އެމީހާއަށް ލިބުނު ނަމަވެސް، ރަނގަޅު ފަރުވާ ދެވުނު ނަމަ އެމީހާ ސަލާމަތް ކުރެވުނީސް ކަމަށެވެ.
އޭޕީން ބުނާ ގޮތުގައި އެ ރިޕޯޓްތައް އެނޫހާއި ހަވާލުކޮށްފައިވަނީ އިސްރާއީލުގެ އިންސާނީ ހައްގުތަކާއި ބެހޭ ޖަމިއްޔާގެ ޑޮކްޓަރެކެވެ.
ފަލަސްތީނުގެ އިދާރާތަކުން ބުނީ، އިސްރާއީލް ޖަލުތަކުގައި މަރުވި ފަލަސްތީން ރައްޔިތުންގެ އަދަދު އިސްރާއީލުން ހާމަކޮށްފައިވާ އަދަދަށްވުރެ އިތުރުވާނެ ކަމަށާއި އިސްރާއީލުން ޖަލުތަކުގައި ގެންގުޅޭ މީހުންގެ އަދަދު ހާމަކުރަން ވެސް ދެކޮޅު ހަދާ ކަމަށެވެ. ފަލަސްތީނުގެ އިދާރާތަކުން ބުނާ ގޮތުގައި މިހާރު ވެސް އިސްރާއީލުގެ ޖަލުތަކުގައި ފަލަސްތީނުގެ 10،000 އަށްވުރެ ގިނަ މީހުން ހައްޔަރުގައި އެބަ ތިއްބެވެ.
