ފަލަސްތީނުގެ ހަމާސް ޖަމާއަތުން އިސްރާއީލުގެ ވެރިރަށް، ޓެލްއަވިވްއަށް ރޮކެޓް ހަމަލާތަކެއް ދީފިއެވެ.

ހަމާސް ޖަމާއަތުގެ ހަތިޔާރު އެޅި ގޮފި، ޤައްސާމް ބްރިގޭޑުން ބުނީ، ޓެލް އަވިވްއަށް އެންމެ ގިނައިން ހަމަލާދީފައިވަނީ އެމް70 ރޮކެޓް ބޭނުން ކޮށްގެން ކަމަށާއި އެމް70ގެ އިތުރުން އެމް90 ރޮކެޓް ވެސް ބޭނުން ކޮށްފައިވާ ކަމަށެވެ.

މިހަމަލާއާއި ގުޅިގެން އިސްރާއީލުގެ ބައެއް މީޑިއާތަކުން ބުނީ، ހަމާސް ޖަމާއަތުގެ އެ ހަމަލާގައި އެއްވެސް މީހަކު މަރުވެފައި ނުވާ ކަމަށާއި ނަމަވެސް ގޮވުންތައް ގޮވައި، ބައެއް ކަހަލަ ގެއްލުންތަކެއް ލިބިފައިވާ ކަމަށެވެ.

ޤައްސާމް ބްރިގޭޑުން ބޭނުން ކޮށްފައިވާ އެމް90 ރޮކެޓަކީ ދިގުރާސްތާއަށް ދަތުރު ކުރެވޭ ގޮތަށް ފަރުމާކޮށްފައިވާ ރޮކެޓްތަކެވެ. އެންމެ ފަހުން މި ރޮކެޓް ބޭނުން ކޮށްގެން ޓެލް އަވިވްއަށް ހަމަލާތަކެއް ދީފައިވަނީ މިއަހަރުގެ މޭއި މަހުގެ 26 ވަނަ ދުވަހުއެވެ.

އެމް90އަށް އެ ނަން ދީފައިވަނީ އިސްރާއީލުން ޝަހީދުކޮށްލާފައިވާ ހަމާސްގެ ފައުންޑިން މެމްބަރުގެ އިތުރުން ޤައްސާމް ބްރިގޭޑުގެ ލީޑަރު، އިބްރާހިމް އަލް-މަގްދަމާއާއި ގުޅުވައިގެންނެވެ. 2022 ވަނަ އަހަރު އުފައްދާފައިވާ މި ރޮކެޓަކީ 90 ކިލޯމީޓަރަށް ދަތުރު ކުރުމުގެ ގާބިލުކަން ލިބިފައިވާ 50 ކިލޯގެ ރޮކެޓެކެވެ.