މަޖިލިސް ރައީސް ތައުލީމާ ދެކޮޅަށް ކެމްޕެއިން ކުރައްވާއިރު، އެޑިޔުކޭޝަން މިނިސްޓަރ އިސްމާއިލް ޝަފީއު ހަނު ހުންނަވާތީވެ، ޕީއެންއެފްގެ ސެކެޓްރީ ޖެނެރަލް މުހައްމަދު މަލީހް ޖަމާލް ފާޑު ވިދާޅުވެއްޖެ އެވެ.

މަލީހް މިފަދައިން ވިދާޅުވެފައި ވަނީ އެކްސްގައި ކުރެއްވި ޕޯސްޓެއްގަ އެވެ.

އެގޮތުން މަލީހް ވިދާޅުވީ އަދުރޭ ތައުލީމާ ދެކޮޅަށް ކެމްޕެއިނެއް ފައްޓަވައިގެން އުޅުއްވާ ކަމަށެވެ.

އަދި އެ ކެމްޕެއިންގައި ދަރިކަލުން، ޓުއަރިޒަމް މިނިސްޓަރ އިބްރާހިމް ފައިސަލް ބައިވެރި ކުރުއްވައިގެން އުޅުއްވާއިރު އެކަމާ މިނިސްޓަރު ޝަފީއު އެއްޗެއް ވިދާޅުނުވުމުން ދަރިވަރުންތައް ހިތްހަމަ ނުޖެހުން ފާޅު ކުރާނެކަމަށް ވެސް މަލީހް ވިދާޅުވި އެވެ.

ގިނަ ފަރާތްތަކުން އަދުރޭ އަދި ފައިސަލްގެ ވެސް އެއްވެސް ތައުލީމެެއް ނެތް ކަމަށް ބުނަމުން އަންނަ އިރު، ދާދި ފަހުން ވެރިކަން ކުރާ މައި ޕާޓީ ޕީއެންސީގެ ހަރުގެ ޖަލްސާގެ ޕޯޑިއަމްގައި އަދުރޭ ވަނީ ތައުލީމަކީ އެހާ މުހިންމު އެއްޗެއް ނޫންކަމަށް ވިދާޅުވެފައެވެ.