އަދުގެ ސަރުކާރުން ރައްޔިތުންނަށް ކަންކަން ހާމަނުކޮށް އޮޅުވާލަމުންގެންދާތީ ޕީއެންއެފްގެ ސެކެޓްރީ ޖެނެރަލް މުހައްމަދު މަލީހް ޖަމާލް ފާޑުވިދާޅުވެއްޖެ އެވެ.
މަލީހް މިފަދައިން ވިދާޅުވެފައި ވަނީ އެކްސްގައި ކުރެއްވި ޕޯސްޓެއްގައެވެ.
އެގޮތުން ރައީސުލްޖުމްހޫރިއްޔާ ޑރ މުހައްމަދު މުއިއްޒު އަދި މަޖިލިސް ރައީސް އަދުރޭ އެތިއްބެވީ ރައްޔިތުންނަށް އޮޅުވާލާ ރައްޔިތުން ހަވާލުކުރި އަމާނާތަކަށް ޚިޔާނާތްތެރިވެގެންކަމަށް މަލީހް ވަނީ ވިދާޅުވެފައެވެ.
މަލީހް އިތުރަށް ވިދާޅުވީ ރައްޔިތުން އެދަނީ އެ ދެބޭފުޅުން ދައްކަވާ ލަންބާޗޯޅާ ވާހަކަ ގާތުން އަޑުއައްސަވަމުންކަމަށެވެ.
އަދި ދުނިޔެ މަކަރާ ޖަހައިގެން އުޅެވިދާނެތޯ އައްސަވާ މަލީހް ވަނީ ސުވާލު ވެސް އުފައްދަވާފައެވެ.
ހާމަކަންބޮޑު ސަރުކާރެއްގެ ގޮތުގައި ދައުވާ ކުރާއިރު ސަރުކާރުގެ ގިނަ ކަންކަން ހުރީ ފޮރުވިފައެވެ. ރައްޔިތުންނަށް ވެފައިވާ ވައުދުތައް ފުއްދުމުގެ ބަދަލުގައި ފެންނަނީ އަނެއްކާވެސް އެ ވައުދުތައް ތަކުރާރު ކުރާ މަންޒަރުކަމުން ގިނަ ބަޔަކު އަންނަނީ ސަރުކާރަށް ފާޑުކިޔުން އަމާޒުކުރަމުންނެވެ.
