ފަލަސްތީނުގެ މުސްލިމުންނާއި ދެކޮޅަށް ޔަހޫދީން ކުރަމުން އަންނަ ހަނގުރާމައަށް 330 ދުވަސް ވެފައިވާއިރު، މި ހަނގުރާމަައިގައި ކޮންމެ ދުވަހަކު އެތައް ބަޔަކު އަދިވެސް ދަނީ ޝަހީދުވަމުންނެވެ.

ޔަހޫދީންނާއި ފަލަސްތީނާ ދެމެދު ހިނގަމުންދާ މި ހަމަނުޖެހުންތައް ވަރަށް ބޮޑަށް ހޫނުވެފައިވާއިރު، ދާދި ފަހުން ޚާން ޔޫނުސްގައި ހިނގި ހަމަނުޖެހުންތަކަކީ ފާއިތުވި ހަފުތާތަކުގެ ތެރޭގައި ހިނގި އެންމެ ވަރުގަދަ އެއް ހަމަލާތަކެވެ. މިއަދު ހެނދުނުގެ ނިޔަލަށް އިޒްރޭލުން ޣައްޒާގެ ދެކުނުގެ ބައެއް ތަންތަނަށް ވައިގެ ހަމަލާތައް ދީފައިވާއިރު ފަލަސްތީނުގެ ހަނގުރާމަވެރިން ވަނީ ޔަހޫދީންގެ ދެކުނުގެ ސަރަހައްދަށް ބަދަލުހިފުމުގެ ރޮކެޓް ހަމަލާތަކެއް ދީފައެވެ.

އިޒްރޭލު ސިފައިން ޚާން ޔުނިސްގެ ހަނގުރާމަވެރި ބޭސްގެ ގޮތުގައި ސިފަކުރާ ސަރަހައްދަށް ރޭގެ ވަގުތެއްގައި ވައިގެ ހަމަލާތަކެއް ދޭން ފަށައިފައިވާ ކަމަށް ރިޕޯޓްތަކުން ދައްކައެވެ. މީހުން ދިރިއުޅޭ ސަރަހައްދުތަކަށް ބޮޑެތި ގެއްލުންތަކެއް ލިބި، އެތައް ބަޔަކު މަރުވި ކަމަށް މަންޒަރު ދުށް މީހުން ރިޕޯޓުކުރި ނަމަވެސް ސީދާ އަދަދުތައް އަދިވެސް ދަނީ ކަށަވަރު ކުރަމުންނެވެ. ރިޕޯޓްތައް ބުނާގޮތުން މި ހަމަލާތައް ދީފައިވަނީ ޣައްޒާ ބޯޑަރު ކައިރީގައި ވާ ޔަހޫދީންގެ އާބާދީތަކަށް އަމާޒުކޮށް ޣައްޒާއިން ރޮކެޓް ހަމަލާތައް އިތުރުކުރުމާ ގުޅިގެންނެވެ.

އޭގެ ރައްދުގައި ފަލަސްތީނުގެ ކަމާބެހޭ ފަރާތްތަކުން ވަނީ ޔަހޫދީންގެ ހަމަލާތައް ކުށްވެރިކޮށް ބައިނަލްއަގުވާމީ ނުފޫޒާއި އެއްބާރުލުމަށް ގޮވާލާފައެވެ. ފަލަސްތީނުގެ ސިއްހަތާ ބެހޭ ވުޒާރާއިން ވަނީ އާންމުންގެ ތެރޭގައި އެތައް ބަޔަކު ޒަޚަމްވެފައިވާ ކަމަށް ރިޕޯޓްކޮށްފައިވާއިރު، ހަނގުރާމަތައް ވަރުގަދަވުމުގެ ސަބަބުން އެ ސަރަހައްދުގައި އިންސާނީ ކާރިސާއެއް އުފެދިދާނެ ކަމުގެ އިންޒާރު ދީފައެވެ.

ބައިނަލްއަގްވާމީ ލެވެލްގައި ހަމަނުޖެހުންތައް ކުޑަކުރުމަށް ދުނިޔޭގެ އެކި ގައުމުތަކުގެ ލީޑަރުން ވަނީ ދެ ފަރާތަށް ވެސް ގޮވާލާފަ އެވެ. އދ އިން ވަނީ މިހާރުން މިހާރަށް ހަނގުރާމަ ހުއްޓާލުމަށާއި ހާލުގައި ޖެހިފައިވާ ސަރަހައްދުތަކަށް އިންސާނީ އެހީ ފޯރުކޮށްދިނުމަށް ގޮވާލާފައެވެ.