ރައީސް އަބްދުﷲ ޔާމީން އަބްދުލްގައްޔޫމު ބައިވެރިވަޑައިގަންނަވާ، ޕީޕަލްސް ނެޝަނަލް ފްރޮންޓު (ޕީއެންއެފް)ގެ ޖަލްސާއެއް މިރޭ އޮންނާނެ ކަމަށް އެ ޕާޓީއިން ހާމަކޮށްފިއެވެ.
އެ ޕާޓީއިން ހާމަކޮށްފައިވާ ގޮތުގައި 03 އޮކްޓޯބަރު ވާ ބުރާސްފަތި ދުވަހުގެ ރޭ ބާއްވާ ޖަލްސާ އޮންނާނީ ހ. ދޫވެހި، ފުރަތަމަ ފަންގިފިލާގައި ހުންނަ އެ ޕާޓީގެ އޮފީހުގައެވެ.
ޖަލްސާ ފެށޭނީ ރޭގަނޑު 8:45ގައި ކަމަށް ޕީއެންއެފް އިން ވަނީ މައުލޫމާތު ދީފައިއެވެ.
ޕީއެންއެފްއިން ސިލްސިލާކޮށް ބާއްވަމުންދާ ޖަލްސާތަކުގައި ގައުމަށް ދިމާވެފައިވާ މައްސަލަތައް ފާހަގަކޮށް ސަރުކާރު ބާރުވެެރިކުރުވުމަށް މަސައްކަތް ކުރަމުންދާކަން ފާހަގަކޮށްލެވެއެވެ.
މީގެ އިތުރުން ރައްޔިތުންނަށް ދިމާވާ ގޮންޖެހުންތައް ފާހަގަކޮށް ސަރުކާރުން ހިންގަމުންދާ ނޭދެވޭ އަދި ނުރަނގަޅު ސިޔަަސަތުތައް ފާހަގަކޮށް ބިނާކުރަނިވި ފާޑުކިޔުންތައް އަމާޒުކުރެއެވެ.
މި ޖަލްސާތަކަށް އާންމުންގެ ބޮޑު ތަރުހީބު ލިބެމުންދާކަންވެސް ފާހަގަކުރެވެއެވެ.
