ގައުމުގައި ކޮރަޕްޝަންގެ އަޑު ގަދަވެ ވެރިންނަށް އަމާޒުވަމުންދާ ތުހުމަތުތަކުން އެވެރިން ބަރީއަކުރަން ޖެހޭ ކަމަށާ އެގޮތަށް އެކަން ހިނގާނީ އެކަންކަން ތަހުގީގުކުރެވިގެން ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވީ ނިމިދިޔަ ހަފްތާގެ ބުރާސްފަތި ދުވަހުގެރޭ ޕީއެންއެފް އޮފީހުގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ރައީސް ޔާމީން ވިދާޅުވީ، ދުވަސްވަރަކީ ސަރުކާރުގެ އެކި އެކި ދިމާލުގައި ވެރިންގެ ގޮތުގައި ތިއްބެވި ބޭފުޅުންނަށް ކޮރަޕްޝަންގެ ތުހުމަތުތަކެއް އަމާޒުވަމުންދާ ދުވަސްވަރެއްކަމަށް ވުމުން އެކަންކަން ކަމުގެ ހަގީގަތް ރައްޔިތުންނަށް ސަރުކާރުގެ ފަރާތުން ހާމަކޮށްދޭން ޖެހޭ ކަމަށެވެ.

އެގޮތުން ރައީސް އޮފީހުގެ ތަރުޖަމާނު މިވަގުތު އެކަންކަމަށް ޖަވާބުދާރީ ވެވަޑައިގެން ރައްޔިތުންގެ ފައިސާއަށް ވެރިން ޚިޔާނާތްތެރިވަމުންދާ ކަމަށް ކުރާ ތުހުމަތުތަކުގެ ހަގީގަތް ހާމަކޮށްދޭން ޖެހޭ ކަމަށް ރައީސް ޔާމީން ވިދާޅުވިއެވެ. އަދި އެމަނިކުފާނު އިތުރަށް ވިދާޅުވީ، އަބަދު އަބަދު ވެރިންނަށް ވައްކަމުގެ ތުހުމަތު އަމާޒުވެގެންދާއިރު އެކަމުން އެ ވެރިން ބަރީއަކުރަން ޖެހޭ ކަމަށާ ބަރީއަ ކުރެވޭނީ އެ މައްސަލަތައް ތަހުގީގުކޮށްގެން ކަމަށް ވެސް ރައީސް ޔާމީން ވިދާޅުވިއެވެ.

ރައީސް ޔާމީން އިތުރަށް ވިދާޅުވީ، މިފަދަ ކަންކަން ފެންމަތިވަމުންދާއިރު، ޕްރޮސެކިއުޓަރ ޖެނެރަލް އޭނާގެ ޒިންމާ އަދާކުރަން ޖެހޭ ކަމަށާ އެގޮތުން އިސްވެ ފުލުހުންނަށް އަންގައިގެން އެ ތުހުމަތުތަކާ ގުޅުން ހުރި މައްސަލަތައް ތަހުގީގުކުރުވަން ޖެހޭކަން ފާހަގަކުރައްވާ ރައީސް ޔާމީން ވިދާޅުވީ އެއީ ޕީޖީއަށް ގާނޫނުން ލާޒިމުކުރާ މަސްއޫލިއްޔަތެއް ކަމަށެވެ.

ރައީސް ޔާމީން ވަނީ ގައުމުގެ ބޮޑުންގެ ތެރޭގައި ކޮރަޕްޝަންގެ މޫލާފައިވާ ކަމަށާ ނަމަވެސް އެކަންކަން ބެލުމަށް ސަރުކާރު ނުކުޅެދިފައިވާކަމަށް ވިދާޅުވެފައެވެ. އެމަނިކުފާނު ވިދާޅުވީ، ރައީސް މުއިއްޒުގެ އެންމެ އަރިސް ބޭފުޅުންގެ ތެރޭގައި ތިއްބެވީ ކޮރަޕްޝަންގެ ހުތުރު އަމަލުން ފަސްބައި ކިލަނބުވެފައި ތިބި ބޭފުޅުން ނަމަވެސް ރައީސް މުއިއްޒަށް އެކަންކަން ބައްލަވަން ކެރިވަޑައި ނުގަންނަވާނެ ކަމަށެވެ. އަދި ކިތަންމެ ގާނޫނެއް ހެދިފައި ހުރި ނަމަވެސް ކިތަންމެ ގިނަ ތަހުގީގީ އިދާރާތައް ހުރި ނަމަވެސް އެބޭފުޅުންގެ މައްސަލަ ނުހިނގާނެކަމަށް ރައީސް ޔާމީން ވިދާޅުވިއެވެ.