ރައީސް ޑރ. މުހައްމަދު މުއިއްޒު ކުޑަކަކޫ މައްޗަށް، އިންޑިއާއިން ތިރިކޮށްފި ކަމަށްކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ވިދާޅުވެއްޖެއެވެ.

ޑރ. ޖަމީލު މިފަދައިން ވިދާޅުވީ އެކްސްގައި ކުރެއްވި ޕޯސްޓެއްގައެވެ.

އިންޑިއާއިން ރާއްޖެއަށް އެހީވާނެ ކަމަށް ރައީސް މުއިއްޒުއާ ހަވާލާ ދެއްވާ ބީބީސީގައި ޝާއިއުކޮށްފައިވާ ޚަބަރަކާ އެކު ޑރ. ޖަމީލު ކުރެއްވި ޕޯސްޓުގައި ވިދާޅުވީ، ރައީސް މުއިއްޒު ދައްކަވަނީ އިސްކޮޅަ ނުބައްދަލު ވާހަކަ ކަމަށް ވިދާޅުވަނީ އެފަދަ ކަންކަން ފެންނަމުންދާތީ ކަމަށެވެ.

އެގޮތުން ރައީސް މުއިއްޒު ރިޔާސީ އިންތިޚާބަށް ވިއްކި އިންޑިއާއަށް ސަލާން ނުޖަހާނެ ގެރެންޓީއާ، ސިޔާދަތީ ގޮތުން ދަމާލާނެ ކަމަށް ވިދާޅުވި ފަލަ ރަތް ރޮގާ، އިންޑިއާ ސިފައިން ބާލާނެކަމަށް ދެއްވި ވަރުގަދަ އިންޒާރުގެ އިތުރުން އިންޑިއާއާ އެކު ކުރީ ސަރުކާރުން ވެފައިވާ ގޮތް ނޭނގޭ އެއްބަސްވުންތައް ހާމަކުރަން ވެވަޑައިގެންނެވި ވައދުވެސް އޮތްތާ އޮއްވާ މިއަދު އިންޑިއާއިން ރައީސް މުއިއްޒު ކުޑަކަކޫ މައްޗަށް ތިރިކޮށްފި ކަމަށްވެސް ޑރ. ޖަމީލު ވަނީ ވިދާޅުވެފައެވެ.

މީގެ އިތުރުން މިއަދު ރައްޔިތުންގެ އިތުބާރު ރައީސް މުއިއްޒަށް ގެއްލިފައިވާ ކަމަށާ އެގޮތުން ކޮންމެ މީހަކުވެސް މިއަދު ރައީސް މުއިއްޒު ސިފަކުރައްވަނީ "ވަށަފަރު މުއިއްޒު"ގެ ގޮތުގައި ކަމަށާވެސް ޑރ. ޖަމީލު ވަނީ ވިދާޅުވެފައެވެ.

ޑރ. ޖަމީލު މިފަދައިން ވިދާޅުވެފައިވާއިރު ރައީސް މުއިއްޒު މިއަދުގެ ވަގުތެއްގައި ވަނި އިންޑިއާއަށް ހާޒިރުކޮށްފައެވެ.