ސަހްޔޫނީންގެ އަސްކަރިއްޔާއިން ބުނެފައިވާ ގޮތުގައި ހަމާސްގެ ކޮމާންޑަރަކު ޝަހީދުކޮށްލުމަށް ތުލްކަރޭމްގައި "އިންޓެލިޖެންސް ބޭސްޑް ކައުންޓާ ޓެރަރިޒަމް އޮޕަރޭޝަނެއް" ހިންގާފައިވާ ކަމަށެވެ.

ފަލަސްތީނުގެ ސިއްހަތާ ބެހޭ ވުޒާރާއިން ބުނީ އެ ކޮމާންޑަރަކީ އުމުރުން 29 އަހަރުގެ އިސްލާމް ޖަމީލް އޮޑެހް ކަމަށެވެ.

ފަލަސްތީނުގެ ނިއުސް އެޖެންސީ ވަފާއިން ބުނި ގޮތުގައި ސަހްޔޫނީން ސިފައިން ވަނީ ތުލްކަރޭމްގެ އަލްސަލާމް އަވަށުގައި ދިރިއުޅޭ އިމާރާތެއް ފަތިހު ވަށާލައި އެޕާޓްމަންޓަކަށް އަމާޒުކޮށް ބަޑީގެ ހަމަލާތައް ދީ، 20 އަށް ވުރެ ގިނަ ބޮން ގޮއްވާލައިފަ އެވެ.

ސަހްޔޫނީންގެ އަސްކަރިއްޔާއިން ބުނީ އޮކްޓޯބަރު މަހުގެ ކުރީކޮޅު އެގައުމުން ދިން ވައިގެ ހަމަލާއެއްގައި ޒާހީ އޫފީ ޝަހީދުވުމާ ގުޅިގެން ތުލްކަރޭމްގައި ހަމާސްގެ އޮޕަރޭޝަންތަކުގެ ލީޑަޝިޕާ އޮޑެހް ހަވާލުވެވަޑައިގެންފައިވާ ކަމަށާއި އިތުރު ހަމަލާތައް ރޭވުމުގައި އަމަލީ ގޮތުން ރާވަމުން ގެންދަވާ ކަމަށެވެ.