ކ.ގުރައިދޫގައި ގަވައިދާ ހިލާފަށް ވިޔަފާރިކޮށް މަސައްކަތްކުރަމުންދިޔަ 30 ބިދޭސީން އިމިގްރޭޝަންގެ ބެލުމުގެ ދަށަށް ގެންގޮސްފައިވާ ކަމަށް މޯލްޑިވްސް އިމިގްރޭޝަން އިން ބުނެފިއެވެ.

ގަވައިދާ ހިލާފަށް އުޅޭ ބިދޭސީންގެ މައްސަލަތައް ހައްލުކުރުމަށް ކުރިއަށްގެންދާ މަސައްކަތުގެ ތެރެއިން މިދިޔަ ބުރާސްފަތި ދުވަހުގެ ފެށި އޮޕަރޭޝަން ފުރަތަމަ ގުރައިދޫގައި ހިންގާފައިވާއިރު އެރަށުން 42 ތަނެއް ބަލައި ފާސްކޮށް، 106 ބިދޭސީން ޗެކްކޮށްފައިވާ ކަމަށް އިމިގްރޭޝަން އިން ބުނެފައިވެއެވެ.

މި އޮޕަރޭޝަންގެ ތެރެއިން ގަވައިދާ ހިލާފަށް އުޅޭ ބިދޭސީންގެ ގޮތުގައި ބަގުލަދޭޝް މީހުންނާއި، ސްރީލަންކާ މީހުންނާއި، ނޭޕާލް މީހުންގެ އިތުރުން ނައިޖީރިއާ މީހުން ހިމެނެއެވެ.

މިދިޔަ ބުރާސްފަތި ދުވަހު ހެނދުނު 10:30 އިން ފެށިގެން ހަވީރު 5:30 އަކަށް 8 ގުރޫޕަކަށް ބަހާލައިގެން ކުރިއަށް ގެންދިޔަ މި އޮޕަރޭޝަންގައި އިމިގްރޭޝަނުގެ ކޮންޓްރޯލަރު މުހައްމަދު ޝަމްއާން ވަހީދު އާއި ޑެޕިއުޓީ ކޮންޓްރޯލާ އަހުމަދު އަޝްފާން އަމަލީ ގޮތުން ބައިވެރިވެވަޑައިގެންފައިވެއެވެ.

ގަވާއިދާ ހިލާފަށް އުޅޭ ބިދޭސީންގެ މައްސަލަ އިތުރުވުމާ ގުޅިގެން އެފަދަ މައްސަލަތައް ރިޕޯޓު ކުރުމަށް ހާއްސަކޮށް އިމިގްރޭޝަނުން، އިމިގްރޭޝަން ވޮޗް އިފުތިތާހުކޮށްފައި ވަނީ މިދިޔަ ޖުލައި މަހުގެ 17 ވަނަ ދުވަހު އެވެ. އިމިގްރޭޝަން ވޮޗް އިފުތިތާހުކުރި ފަހުން މިހާތަނަށް ޖުމްލަ 861 ކޭސް ރިޕޯޓުކޮށްފައިވެ އެވެ.