ސަހްޔޫނީން ޣައްޒާއަށް ދިން ހަމަލާތަކުގައި ފަތިހުން ފެށިގެން މިހާތަނަށް 27 މީހުން ޝަހީދުވެއްޖެއެވެ.
ޣައްޒާގައި ގެދޮރު ގެއްލިފައިވާ މީހުންނަށް ހިޔާވަހިކަން ފޯރުކޮށްދޭ ސްކޫލަކަށް ދިން ފުރަތަމަ ހަމަލާގައި ކުޑަކުއްޖަކާއި ހަތް އަންހެނުން ހިމެނޭ ގޮތަށް 27 މީހުން ޝަހީދުވެފައިވާ ކަމަށް ފަލަސްތީނުގެ އޮފިޝަލުން ބުނެފައިވެއެވެ. ސަހްޔޫނީން ދަނީ ޣައްޒާގެ އެކި ސަރަހައްދުތަކަށް ހަމަލާތައް އަމާޒުކޮށް ބަޑިޖަހަމުންނެވެ.
ސަހްޔޫނީން ޣައްޒާއަށް ދިން ހަމަލާތަކުގައި ފަލަސްތީނުގެ 42،000 އަށް ވުރެ ގިނަ މީހުން ޝަހީދުވެފައިވާ ކަމަށް އެގައުމުގެ ސިއްހީ އިދާރާތަކުން ހާމަކޮށްފައިވެއެވެ. މި ހަނގުރާމައިގެ ސަބަބުން ޣައްޒާގެ ބޮޑު ސަރަހައްދެއް ހަލާކުވެ، 2.3 މިލިއަން މީހުންގެ އާބާދީގެ ގާތްގަނޑަކަށް 90 އިންސައްތަ ގެދޮރު ގެއްލިފައިވެއެވެ.
ޣައްޒާގެ އިތުރުން ލުބްނާން އަދި އިރާން އަށްވެސް ސަހްޔޫނީން އަންނަނީ ހުއްޓުމެއްނެތި ހަމަލާތައް ދެމުން އަންނައިރު ބަދަލުގައި އެ ގައުމުތަކުންވެސް ވަރުގަދަ ހަމަލާތައް ދެމުން އަންނަކަން ފާހަގަކުރެވެއެވެ.
ރިޕޯޓްތަކުން ބުނާ ގޮތުގައި ލުބުނާނުން ސަހްޔޫނީންގެ ވެރިރަށް، ޓެލް އަވިވްއަށް ފޮނުވާލި މިސައިލް ހަމަލާތަކެއްގައި އެ ސަރަހައްދުގައި ވަނީ ރޯވެ އަނދަން ފަށާފައެވެ. އަދި އެސަރަހައްދަށް ދިން ހަމަލާގައި 4 މީހަކަށް އެކިވަރުގެ ޒަހަމްތައް ވެފައިވާ ކަމަށް ވަނީ ރިޕޯޓް ކޮށްފައެވެ.
