ކެނެޑާގައި ދޫނި ރޯގާއަށް މީހަކު ފައްސިވެއްޖެއެވެ. ފައްސިވެފައިވަނީ ކުޑަކުއްޖެއް ކަމަށް މައުލޫމާތު ލިބެއެވެ.

އޭނާއަކީ އެ ގައުމުގައި އެ ބައްޔަށް ފައްސިވި ފުރަތަމަ މީހާކަމަށްވެސް އެ ގައުމުން ރިޕޯޓްކޮށްފައިވެއެވެ.

ޕްރޮވިންސް ހެލްތު ޑިޕާޓްމަންޓުން ބުނީ މި ކުއްޖާއަށް އެޗް5 އެވިއަން ފްލޫ ޖެހިގެން ކުޑަކުދިންގެ ހޮސްޕިޓަލެއްގައި ފަރުވާ ދެމުންދާ ކަމަށެވެ.

އަދި ކަމާއި ގުޅުން ހުރި ފަރާތްތަކުން ދަނީ ބަލި ޖެހެން މެދުވެރިވި ސަބަބާއި އެ މީހާއާ ގާތުން އެއްތާވި ބަޔަކު ތިބިތޯ ބެލުމުގެ މަސައްކަތް ކުރަމުންނެވެ.

ދޫނި ރޯގާ އެންމެ ގިނައިން ފެންނަނީ ޖަންގަލީގެ ދޫންޏާއި ކުކުޅުގެ ބާވަތްތަކުން ނަމަވެސް ދާދި ފަހުން ވަނީ އެހެނިހެން ޖަނަވާރުތަކުގެ ކިބައިންވެސް މި ބަލި ފެނިފައި ވެއެވެ.