ފުޓްބޯލް އެސޯސިއޭޝަން އޮފް މޯލްޑިވްސް އެފްއޭއެމް) އާ ޖެނެރަލް ސެކްރެޓަރީގެ މަގާމަށް ނާހިލް އަހުމަދު ސިއްދީގު އައްޔަންކުރަން ނޯމަލައިޒިން ކޮމިޓީން ނިންމައިފިއެވެ.
ސްޕޯޓްސް މިނިސްޓްރީގެ ސީނިއާ ޕޮލިޓިކަލް ޑައިރެކްޓަރުގެ މަގާމު އަދާކުރަމުން ދިޔަ އުމުރުން 24 އަހަރުގެ ނާހިލް ވަނީ މީގެ ކުރިން އެފްއޭއެމްގެ ކޮމްޕެޓިޝަން ޑިިޕާޓުމެންޓުގައިވެސް މަސައްކަތް ކޮށްފައެވެ. އެފްއޭއެމްގެ މަސައްކަތަށް ނާހިލް ރަސްމީކޮށް ނިކުންނާނީ އަންނަ ހަފްތާގައެވެ.
ނާހިލް، އެފްއޭއެމްގެ ވަޒީފާއިން މިއަހަރުގެ ފެބްރުއަރީ މަހު ވަކިވި އިރު އޭނާ ހުންނެވީ ކޮމްޕްޓީޝަން ޑިޕާޓްމެންޓްގެ އެކްޓިން ހެޑްގެ ގޮތުގައެވެ.
ނާހިލް މީގެކުރިން ވަނީ 16 އަހަރުން ދަށުގެ ގައުމީ ފުޓްބޯޅަ ޓީމަށާއި މާޒިއާ ސްޕޯޓްސްގެ ޔޫތު ޓީމަށްވެސް ކުޅެފައެވެ.
އޭނަ އެފްއޭއެމްގެ ޖެނެރަލް ސެކްރެޓަރީގެ މަގާމަށް އައްޔަނުކުރަން ނޯމަލައިޒިން ކޮމިޓީން ނިންމީ މަގާމަށް ކުރިމަތިލި ފަރާތްތަކުގެ ވަނަވަރާއި ތައުލީމީ ތަޖުރިބާ އަދި އިންޓަވިއު އަށް ބެލުމަށްފަހު ކަމަށް އެ ކޮމިޓީން ބުންޏެވެ. ނާހިލް އަކީ ވެސްޓް އޮފް އިންގްލެންޑް ޔުނިވަސިޓީގެ ބިޒްނަސް މެނޭޖްމެންޓް އަދި ބިޒްނަސް އެޑްމިނިސްޓްރޭޝަނުން ފުރަތަމަ ޑިގްރީ އާއި މާސްޓާސް ޑިގްރީވެސް ހާސިލުކޮށްފައިވާ ޒުވާނެކެވެ.
އެފްއޭއެމްގެ ޖެނެރަލް ސެކްރެޓަރީގެ މަގާމު އެންމެ ފަހުން އަދާކުރީ ޖައުޝަން ޝަރީފެވެ.
އެފްއޭއެމްގެ ވަގުތީ ޖެނެރަލް ސެކްރެޓަރީގެ މަގާމަށް ޖައުޝަން ހަމަޖެއްސެވީ އެފްއޭއެމްގެ ކުރީގެ ރައީސް ބައްސާމް އަދީލް ޖަލީލެވެ.
