ހައްދުފަހަނަ އަޅާފައިވާ ސަހްޔޫނީން ފާއިތުވި 13 މަސް ދުވަހުގެ ތެރޭގައި ދިން ހަމަލާތަކުގައި ޝަހީދުވި ފަލަސްތީނީންގެ އަދަދު 43،050 އިން މައްޗަށް ހިނގައްޖެ އެވެ.

ގާޒާ ސަރުކާރުގެ މީޑިއާ އޮފީހުން ބުނީ ސަހްޔޫނީންގެ ހަމަލާތަކުގައި ޝަހީދުވި މީހުންގެ ތެރޭގައި 17700 ކުޑަކުދިންނާއި 10800 އަންހެނުން ހިމެނޭ ކަމަށެވެ. އަދި އޭގެތެރޭގައި 186 ނޫސްވެރިންނާއި 760 ސިއްހީ ހިދުމަތްތެރިން ވެސް ހިމެނޭ ކަމަށް އެ އޮފީހުން ބުނެފައިވެ އެވެ.

އެ އަދަދަކީ ސަހްޔޫނީންގެ ހަމަލާތަކުގައި ބިމާ ހަމަވެފައިވާ އިމާރާތްތަކުގެ އަޑީގައި ވަޅުލެވިފައި ތިބި މީހުންނާއި ހޮސްޕިޓަލުތަކަށް ރިކޯޑު ނުކުރެވޭ މަރުތައް ނުހިމަނާ ގުނާ އަދަދަކަށް ވާތީ ގާޒާގައި ޝަހީދުވި މީހުންގެ އަސްލު އަދަދު އެއަށްވުރެ ވެސް އެތައް ގުނައެއް އިތުރުވާނެ ކަމަށް އެ ސިޓީގައި ހަރަކާތްތެރިވާ ޑޮކްޓަރުންނާ ހަވާލާދީ ބީބީސީގައި ރިޕޯޓު ކޮށްފައިވެ އެވެ.

ދިގުމިނުގައި 41 ކިލޯމީޓަރު އަދި ފުޅާމިނުގައި 10 ކިލޯމީޓަރު ހުންނަ ގާޒާއަށް ހަނގުރާމަ ފެށުނީއްސުރެ މިމަހުގެ މެދާ ހަމައަށް ސަހްޔޫނީން 71200 ބޮން އަޅާފައިވާ ކަމަށް އެމެރިކާގެ އިންޓެލިޖެންސް އެސެސްމެންޓުތަކާ ހަވާލާދީ ސީއެންއެންއިން ރިޕޯޓުކޮށްފައިވެ އެވެ. އެ ނޫހުން ރިޕޯޓުކޮށްފައި ވަނީ އޭގެތެރެއިން 40-45 އިންސައްތަ ހަމަލާ ސަހްޔޫނީން ދީފައި ވަނީ ވަކި ތަނަކަށް އަމާޒު ނުކޮށް ކަމަށެވެ.

ސަހްޔޫނީން ގާޒާއަށް ހަމަލާދޭން ފެށީ މިދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހު ގާޒާގައި ވެރިކަން ކުރާ ހަމާސް ޖަމާއަތުން އިސްވެ ސަހްޔޫނީނަށް ދިން ކުއްލި ހަމަލާގައި އިޒްރޭލުގެ 1200 މީހުން މަރާލުމާ ގުޅިގެންނެވެ.

އިންޓަނޭޝަނަލް ނެޓްވަރކް ފޯރ އެއިޑް، ރިލީފް އެންޑް އެސިސްޓެންސް (އިނާރާ) ގެ ވެރިޔާ އަރްވާ ޑަމޮން ބުނެފައިވާ ގޮތުގައި ގާޒާގައި މިހާރު އޮތީ ބިރުވެރި ހާލަތެއްގަ އެވެ.

ގާޒާގެ މެދު ސަރަހައްދު ދޭރުލް ބަލަހުގައި ތިބި އުތުރު ގާޒާގެ ނަގުލުމީހުންނަށް އެހީވަމުންދާ އިނާރާގެ ފަރާތުން އަލްޖަޒީރާއަށް ދިން އިންޓަވިއުއެއްގައި އޭނާ ބުނެފައިވަނީ، ސަހްޔޫނީންގެ ހަމަލާތައް މެދުކެނޑުމެއް ނެތި ކުރިޔަށްދާ ކަމަށާއި، އިންސާނީ އެހީއާއި ސިއްހީ އެހީ ބޭނުންވާ މިންވަރަށް ނުލިބޭ ކަމަށެވެ.

އދ.އިން ބުނީ ގާޒާގެ އުތުރުގައި ތިބި ފަލަސްތީނުގެ އާންމުންގެ ހާލަތަކީ ކެތް ނުކުރެވޭނެ ހާލަތެއް ކަމަށާއި އެ ހަމަނުޖެހުން ކުރިއަށް ގެންދަނީ ބައިނަލްއަގްވާމީ އިންސާނީ ގާނޫނުގެ ޝަރުތުތަކަށް މާބޮޑު ފަރުވާލެއް ނުބަހައްޓާ ކަމަށެވެ.

ކާބޯތަކެއްޗާއި ބޭހާއި، ކޮންމެހެން ބޭނުންވާ ސާމާނު ފޯރުކޮށްދިނުމަށް ކުރާ މަސައްކަތަށް ސަހްޔޫނީންގެ ކަމާބެހޭ ފަރާތްތަކުން ހުރަސް އަޅަމުންދާތީ، މީހުންގެ ފުރާނަ ނުރައްކަލަށް ހުށަހެޅިފައިވާ ކަމަށް އދ.އިން ބުނެ އެވެ.

ސަހްޔޫނީން ގާޒާއަށް ދެމުން އަންނަ ހަމަލާތަކުގައި ގާޒާގެ 90 އިންސައްތައަށް ވުރެ ގިނަ އިމާރާތްތައް އެއްކޮށް ވަނީ ސުންނާފަތި ކޮށްލާފައިވެ އެވެ. ހަނގުރާމައިގެ ސަބަބުން 2.3 މިލިއަން މީހުންގެ އާބާދީއެއް އޮންނަ ގާޒާގައި ބައިލައްކައަށްވުރެ ގިނަ ފަލަސްތީނީން ވަނީ މަގުމަތިވެފަ އެވެ.