މުވާސަލާތީ ހިދުމަތް ފޯރުކޮށްދޭ ފަރާތްތަކުގެ އަތުން އަންނަ އަހަރުން ފެށިގެން އިތުރު ފީއެއް ނަގަން ނިންމައިފިއެވެ.
އަންނަ އަހަރަށް ލަފާކޮށްފައިވާ ދައުލަތުގެ ބަޖެޓުގައި ވަނީ ދައުލަތުގެ ފިސްކަލް އަދި ދަރަނީގެ ދެމެހެއްޓެނިވިކަން އިއާދަކޮށް، ބޭރުގެ ފައިސާއިން ސަރުކާރުން ކުރަން ޖެހޭ ހަރަދުތައް ކުރުމުގެ ގާބިލްކަންް އިތުރުކުރުމަށް ޑޮލަރުން ލިބޭ އާމްދަނީ އިތުރު ކުރަން ސިޔާސަތުތަކެއް ހިމަނާފައެވެ.
އޭގެ ތެރެއިން އެއް ކަމަކީ ރާއްޖޭގެ ރޭޑިއޯ ފްރިކުއެންސީ ސްޕެކްޓްރަމް ހަރުދަނާކަމާ އެކު ބެލެހެއްޓުމަށް ފްރިކުއެންސީ ސްޕެކްޓްރަމް ޗާޖެއް ނެގުމެވެ.
އެ ފީ ނަގާނީ އަންނަ އަހަރުގެ ތެރޭގަ އެވެ. އެކަން ކުރާނީ އެކަމާ ގުޅޭ ގާނޫނާއި ގަވާއިދުތަކަށް ބަދަލު ގެނެސްގެންނެވެ. ނަމަވެސް އެ ފީ ނަގައިގެން ދައުލަތަށް ލިބޭނެ ކަމަށް ލަފާކުރާ އާމްދަނީއެއް ބަޖެޓްގައި ހިމަނައިފައެއް ނުވެއެވެ.
އަންނަ އަހަރު އާމްދަނީގެ ގޮތުގައި ލިބޭނެ ކަމަށް ބަޖެޓުގައި ހިމަނާފައިވަނީ 40 ބިލިއަން ރުފިޔާ އެވެ. އޭގެ ތެރެއިން 29 ބިލިއަން ހޯދަން ކަނޑައަޅާފައިވަނީ ޓެކްސްގެ ގޮތުގައެވެ.
