މިދިޔަ އަހަރުގެ އޮކްޓޯބަރު މަހުގެ 7 ވަނަ ދުވަހުން ފެށިގެން ސަހްޔޫނީން ފަލަސްތީނާއި ދެކޮޅަށް ހިންގަމުން އަންނަ ހަނގުރާމައިގައި މިހާތަނަށް 44،363 މީހުން ޝަހީދުވެފައިވާ ކަމަށް ފަލަސްތީނުގެ ސިއްހަތާއި ބެހޭ ވުޒާރާއިން ހާމަކޮށްފިއެވެ.

ހަނގުރާމަ ފެށުނީއްސުރެ ޝަހީދުވި މީހުންގެ އަދަދު 44،363 އަށް އަރާފައިވާއިރު އިތުރު 105،070 މީހުން ޒަހަމްވެފައިވާ ކަމަށް އެ ވުޒާރާއިން ބުނެއެވެ.

ފަލަސްތީނުގެ އިތުރުން ލުބްނާން އަދި އިރާންއަށް ސަހްޔޫނީންގެ ހަމަލާތައް މިހާރު މިހާރު އަމާޒުވެފައިވާއިރު އަދިވެސް ހުއްޓުމެއްނެތި ހަނގުރާމަ ދަނީ ކުރިއަށެވެ.

ހަނގުރާމަ ހުއްޓާލުމަށް ސަހްޔޫނީން އެއްބަސްވެފައިވީ ނަމަވެސް މި އެއްބަސްވުމަށް ދެވަނައަށް ވީ ދުވަހު ސަހްޔޫނީންނާއި ލުބުނާނުން އެއްބަޔަކު އަނެއްބަޔަކަށް ހަމަލާތައް ދޭ ކަމަށް ތުހުމަތުކުރަން ފަށައިފައިވެއެވެ.

ލުބުނާނުން ހިޒްބުﷲ ޖަމާޢަތުން ބުނެފައިވަނީ ސަހްޔޫނީންގެ ޑްރޯނެއް ލުބުނާނުގެ ސަރަޙައްދަށް ވަދެ، އެ ޤައުމުގެ ދެކުނު ސަރަޙައްދުގައި ހަރަކާތްތެރިވެފައިވާ ކަމަށެވެ. އަދި މިއީ ހަނގުރާމަ ހުއްޓާލުމަށް ކުރެވިފައިވާ ޝަރުތުތަކާ ޚިލާފު ކަމެއް ކަމަށް އެޖަމާއަތުން ވަނީ ބުނެފައެވެ.

އެހެންނަމަވެސް ސަހްޔޫނީންގެ ސިފައިންގެ ފަރާތުން ބުނެފައިވަނީ އެ ޤައުމުގެ އުތުރު ސަރަޙައްދުގައި ހިޒްބުﷲގެ ފަރާތުން ހަތިޔާރު ބޭނުންކޮށްފައިވާ ކަމަށެވެ. ސަހްޔޫނީން ބުނާ ގޮތުގައި ހިޒްބުﷲއިން ވަނީ އެ ޤައުމުގެ ސަރަޙައްދަށް މިސައިލްތަކެއް ދޫކޮށްފައެވެ. އަދި މިއީ ހުއްޓުމަކަށް އައި ހަނގުރާމައިގެ ޝަރުތުތަކާ ޚިލާފު ކަމެއް ކަމަށް ސަހްޔޫނީން ވެސް ވަނީ ބުނެފައެވެ.

މެދު އިރުމަތީގައި އުފެދިފައިވާ މި ހަނގުރާމައިގެ ސަބަބުން ދުނިޔޭގެ އެކި ސަރަހައްދުތަކުގައި ފަލަސްތީންގެ މިނިވަންކަމަށް ގޮވާލާ އަންނަނީ އިހްތިޖާޖުތައް ކުރަމުންނެވެ.

ދިވެހިރާއްޖެއަކީވެސް ފަލަސްތީނުގެ މިނިވަންކަމަށް އެންމެ ބޮޑަށް ގޮވާލަމުންދާ އެއް ގައުމެވެ. ސަހްޔޫނީންނަށް މި ގައުމަށް އެތެރެނުވެވޭނެހެން އެގައުމުގެ ޕާސްޕޯޓް މަނާކުރުމަށް ދިވެހިން ގޮވާލަމުން އަންނަތާ އަހަރެއް ވެފައިވާއިރު ސަރުކާރުން މިކަމަށް މާ ބޮޑު ސަމާލުކަމެއް ދީފައިނުވާ ކަން ފާހަގަކުރެވެއެވެ.