ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތުމަށް އުފެއްދެވި މިނިސްޓްރީ އޮފް ދިވެހި ލެންގުއޭޖް އެންޑް ކަލްޗާ އެންޑް ހެރިޓޭޖް މިނިސްޓްރީ އަކީ ބޮޑު ބޭކާރު ހަރަދުކަޓެއް ކަމަށް ރައްޔިތުން ބުނަމުން ދަނިކޮށް "ކަޅުއޮށްފުންމި - ދިވެހި ގައުމިއްޔަތުގެ ދަރުބާރު" ނަމުގައި އިވެންޓެއް ބާއްވައިފި އެވެ.

މުއިއްޒުގެ ވެރިކަމަށް އަހަރެއް ފުރިގެން ދިޔައިރު ގައުމިއްޔަތު މިނިސްޓްރީ ވެގެން ގޮސްފައިވަނީ އެންމެ ހަރަދު ބޮޑު މަސައްކަތެއް ހިދުމަތެއް ރައްޔިތުންނަށް ފޯރުކޮށް ނުދީ އޮންނަ ބޭކާރު މިނިސްޓްރީ އަކަށެވެ.

ގައުމިއްޔަތު މިނިސްޓްރީގެ ސިޔާސީ މުވައްޒަފުންގެ މުސާރަ ދިނުމަށް މަހެއްގެ މައްޗަށް 1,001,000 ރ. (އެއް މިލިއަން އެއްހާސް ރުފިޔާ) ހޭދަވެ އެވެ. އެއީ، އަހަރެއްގެ މައްޗަށް 12،012،000ރ. (ބާރަ މިލިއަން ބާރަ ހާސް ރުފިޔާ) އެވެ.

"ކަޅުއޮށްފުންމި – ދިވެހި ގައުމިއްޔަތުގެ ދަރުބާރު" ގެ ނަމުގައި މިއަދު ފެށި އިވެންޓް އަކީ، ދިވެހި ގައުމިއްޔަތުގެ އިސްވަރުގެ ފަރާތުން ކޮންމެ ހުޅަނގު މޫސުމަކާއި އިރުވައި މޫސުމެއްގައި ބޭއްވުމަށް ހަމަޖެހިފައިވާ ކަމެކެވެ.

ދިވެހީންގެ ގައުމިއްޔަތާއި އަމިއްލަ ވަންތަކަން ރައްކާތެރިކުރުމަށާއި އެކަމަށް ހޭލުންތެރިކަން އިތުރުކުރުމަށް މަސައްކަތް ކުރުމުގެ ގާބިލުކަން ގައުމިއްޔަތު މިނިސްޓަރު އާދަމް ނަސީރު ކިބައިގަން ނެތް ކަން މިހާރު ވަނީ ސާފުވެފަ އެވެ.

ރައީސް މުއިއްޒުގެ ފަސް އަހަރުގެ ދައުރުގެ ތެރޭގައި މިހާރު ގައުމިއްޔަތު މިނިސްޓްރީގެ މުސާރަ ދިނުމަށް މިކުރާ ހަރަދަށް އެކަނި ބެލިޔަސް 60 މިލިއަން ރުފިޔާ ފަހަނައަޅައި ދާނެ އެވެ.

ރައްޔިތުންގެ ފައިސާއިން ބޭކާރު ހަރަދުނުކުރައްވާ ގައުމިއްޔަތުގެ ނަމުގައި ތިޔަކުރައްވާ އިސްރާފް ހުއްޓާލައްވާށެވެ. ދިވެހި ގައުމިއްޔަތުގެ މިނިސްޓަރު އާދަމް ނަސީރަށް ރައްޔިތުންގެ ދަރުބާރުގައި ވަނީ އިތުބާރު ގެއްލިފަ އެވެ.