ރައީސް ޑރ. މުހައްމަދު މުއިއްޒުގެ ދޮގުތަކުން ދިވެހިރާއްޖޭގެ ގައުމިއްޔަތު ވެއްޔާ މޮޑެވިގެން ހިނގައްޖެ ކަމަށް ކުރީގެ ނައިބު ރައީސް، ޑރ. މުހައްމަދު ޖަމީލު އަހުމަދު ވިދާޅުވެއްޖެއެވެ.
ޑރ. ޖަމީލު މިފަދައިން ވިދާޅުވެފައިވަނީ، ދިވެހިރާއްޖޭގެ ޤައުމީ ދުވަހުގެ ހެޔޮއެދުމާއި ތަހްނިޔާ ލޮބުވެތި އެންމެހާ ރައްޔިތުންނަށް އަރިސްކޮށް އެކްސްގައި ކުރެއްވި ޕޯސްޓެއްގައެވެ.
ޑރ. ޖަމީލު ވިދާޅުވީ، މި ސަރުކާރުން ގައުމިއްޔަތު ވެއްޔާ މޮޑެލައިފި ކަމަށާ ވެރިމީހާ ގެންދަނީ ހުސް ދޮގު ހަދަމުން ކަމަށެވެ.
އެގޮތުން ވެރިކަން ހޯދުމަށް ރައީސް އަބްދުﷲ ޔާމީނުގެ ހުސް ގޮނޑި ބޭނުންކޮށްގެންވެސް ހެދި ބޮޑު މަކަރެއްކަމަށާ ރައީސް މުހައްމަދު މުއިއްޒުގެ ޝުކުރުވެރިވުން ނެތް މިންވަރު އެކަމުންވެސް ހާމަވާ ކަމަށެވެ.
މިގައުމުގެ ތުއްތު ކުދިންނަށްވެސް މިއަދު ދޮގު ހެދުން ނޫން ކަމެއް ނުފެނަކަމަށް ވިދާޅުވެ ޑރ. ޖަމީލު ވަނީ ގައުމީ ދުވަހުގެ ތަހުނިޔާ ރައީސް މުއިއްޒު ފޮނުއްވި ޕޯސްޓުގައި ގައުމީ ދިދައިގެ ހުރުމަތް ކަނޑާލާފައިވާތީ އެކަމަށް ވެސް ނުރުހުން އަމާޒުކުރައްވާފައެވެ.
އެގޮތުން އެ ފޮޓޯއިން ފެންނަނީ ދިވެހިންގެ ފަޚުރުވެރި ދިދައަށްވެސް ދޮގުހަދާފައިވާ މަންޒަރުކަމަށާ ރައީސް މުއިއްޒުގެ ބަހާއި ޢަމަލު ދިމާނުވުމުގެ ސަބަބުން ޤައުމިއްޔަތުގެ ރުކުންތައް ފަނާކޮށްފިކަމަށް ވެސް ޑރ. ޖަމީލު ވަނީ ވިދާޅުވެފައެވެ. އަދި ޑރ. ޖަމީލު، ރައީސް މުއިއްޒުގެ ވެރިކަން ސިފަކުރެއްވީ ޤައުމިއްޔަތަށް ދިމާވި އެންމެ ގެއްލުން ދެނިވި ވެރިކަމުގެ ގޮތުގައެވެ.
