2023 އޮކްޓޯބަރު 07 ވަނަ ދުވަހަކީ ފަލަސްތީނުގެ އިތުރުން ބައިނަލް އަގްވާމީ ގޮތުންވެސް ތާރީޚީ ދުވަހެކެވެ. އިސްލާމީ އުއްމަތެއް ފަނާކޮށްލުމަށް ނިރުބަވެރި ޔަހޫދީންގެ މަސައްކަތް ފެށިގެން ދިޔަ ދުވަހެވެ.

ސަހްޔޫނީން ފަލަސްތީނާއި ދެކޮޅަށް ހިންގަމުންދާ ގަތުލުއާންމަށް އަހަރެއް ވެފައިވާއިރު ފަލަސްތީނުގެ ހައްގުގައި ވަކާލާތުކޮށް އަޑުއުފުލަމުންދާ މީހުން ހުއްޓުމެއްނެތި އަންނަނީ ފަލަސްތީނުގެ މިނިވަންކަމަށް ގޮވާލާ އެގައުމަށް އޮތް ލޯބި ދައްކަމުންނެވެ.

ދުނިޔޭގެ އެކި ސަރަހައްދުތަކުގައި ދިރިއުޅެމުންދާ ފަލަސްތީނުގެ ރައްޔިތުންނަށް ބަހައްޓާ އޯގާތެރިކަމާއި ދޭ ލޯބި ސޯޝަލް މީޑިޔާގެ އެކި މަންސަތަކުން އަންނަނީ ފެންނަމުންނެވެ.

މިގޮތުން، މިސްރުގެ ޓެކްސީ ޑްރައިވަރަކު ފަލަސްތީނުގެ ރައްޔިތަކު އެ ޓެކްސީއިން ކުރި ދަތުރަށް އަގު ދައްކަން އުޅުމުން އެކަން މަނާކޮށް ޑްރައިވަރު ރޯ މަންޒަރު ދައްކުވައިދޭ ވީޑިއޯއެއް ސޯޝަލް މީޑިޔާގައި ވަނީ ވައިރަލް ވެފައެވެ.

މި ވީޑިއޯގައި ފަލަސްތީނުގެ މިނިވަންކަމަށްޓަކައި ބޮޑެތި ގައުމުތަކުންނާއި ބާރު އޮތް ވެރިންތައް މަސައްކަތް ނުކުރާތީ ޓެކްސީ ޑްރައިވަރު ވަނީ އެމީހާ ކިބައިން މާފަށް އެދިފައެވެ. އަދި ފަލަސްތީނާއި ސުންނާފަތި ކުރަމުންދާ އިސްލާމީ ގައުމުތަކަށް ނަސްރު ދެއްވާތޯ އަބަދުވެސް އެދޭކަމަށް ބުނެފައިވެއެވެ.

ފަލަސްތީނަކީ ދިވެހިންވެސް ލޯބިވާ ޚާއްސަ ކުލުނެއް ޖެހިފައިވާ ގައުމެކެވެ. ފަލަސްތީނާއި މެދު ސަހްޔޫނީން އަމަލުކުރަމުންދާ ނުބައި ނުލަފާކަން ހުއްޓުވުމަށް ކެނޑިނޭޅި އެންމެ މަސައްކަތް ކުރާ އެއް ބަޔަކީ ދިވެހިންނެވެ.

ހިތާމައަކީ ދިވެހިންގެ ހިތުގައި ޚާއްސަ ގަދަރެއް ދެވިފައިވާ މުސްލިމް އަޚުންނާއި އުޚްތުން ޝަހީދުކުރަމުން ދާއިރު މިއަދުގެ ސަރުކާރުން އެއްވެސް ފިޔަވަޅެއް އަޅުއްވާތަން ނުފެންނާތީ އެވެ.

ރައްޔިތުން ބޭނުންވަނީ ވާހަކަ މަދުކޮށް އަމަލުން ސަހްޔޫނީން ހިންގަމުންދާ ގަތުލުއާންމު ކުށްވެރިކުރުމަށެވެ. ނަމަވެސް ސަހްޔޫނީންގެ ޕާސްޕޯޓް މަނާކުރުމުގެ މައްސަލަ ސަރުކާރުން އަންނަނީ "ނިމުމެއްނެތް މާދަމާ" އަކަށް ފަސްކުރަމުންނެވެ.