2023ގައި ބޭއްވި ދިވެހިރާއްޖޭގެ ރިޔާސީ އިންތިހާބުގައި ދިވެހި ރައްޔިތުންގެ ގޭގޭގައި ޓަކި ޖެހި "މުއިއްޒު" ހޯދަން ޖެހިފައިވާ ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

ހޯމަ ދުވަހުގެރޭ ބޭއްވި ޕީއެންއެފް ޖަލްސާގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ، ރައްޔިތުންނަށް ނުހަނު ގިނަ ވައުދުވެ ރައްޔިތުންނަށް ގިނަ ކަންކަން ހައްލުކޮށްދެއްވާނެ ކަމަށް ވައުދުވެ ވެރިކަމަށް ވަޑައިގެންނެވި، މ. ދިމްޔާތު ޑރ މުހައްމަދު މުއިއްޒު ގެއްލި މިއަދު ވެރިކަމުގައި ހުރީ އެހެން މުއިއްޒެއްކަމަށް ފެންނަ މަންޒަރުތަކުން ހާމަވާތީ ދިވެހި ރައްޔިތުން ގެންދަނީ ކަންބޮޑުވުން ފާޅުކުރަމުން ކަމަށާ އެމަނިކުފާނަށް ވެސް އެހެން އެކަން އޮތް ކަން ފާހަގަކުރެއްވޭ ކަމަށެވެ.

ރައީސް ޔާމީން ވިދާޅުވީ އެމަނިކުފާނަށް އެފަދަ ގޮތަށް ވިސްނިވަޑައިގެންނެވެނީ މިއަދު ވެރިކަމުގެ ހުންނެވި ބޭފުޅާގެ ކިބައިން ކުރިން ވިދާޅުވި ހުރިހާ ކަމެއް ބަދަލުވެ ވައުދުތައް އޮޔާދާ މަންޒަރު ފެނިވަޑައިގަންނަވާތީ ކަމަށެވެ.

ރައީސް ޔާމީން އިތުރަށް ވިދާޅުވީ، ރައީސް މުއިއްޒުގެ ސަރުކާރަށް ޖަވާބުދާރީ ނުވެވޭ ކިތަންމެ ކަމެއް ހުރި އިރު އެ ލިސްޓުގެ އެންމެ ކުރީގައި އޮތީ ކޮރަޕްޝަން ކަމަށާ ނަމަވެސް އެކަމާ ގުޅިގެން ވަޒީރު އަލީ އިހުސާން ދައްކަވާ ވާހަކަ ވެސް ދެކޮޅު ނުޖެހޭ ކަމަށެވެ.