Raees Muizzu Hahdhavany Dhogu Mahchah: Maleeh

ރައީސް ޑރ.މުހައްމަދު މުއިއްްޒު ވެވަޑައިގެންނެވި އެންމެ ބޮޑު އެއް ވައުދު ނުފުއްދަވާ ވައުދުތައް ފުއްދަވާނަންކަމަށް ވިދާޅުވަމުން ގެންދަވާތީ އެމަނިކުފާނު ހައްދަވަނީ ދޮގު މައްޗައް ދޮގުކަމަށް ރައީސް ޔާމީންގެ ޕާޓީ އުފެއްދުމުގައި އިސްކޮށް ހަރަކާތްތެރިވާ އެއް ފަރާތްކަމަށްވާ މުހައްމަދު މަލީހް ޖަމާލް ވިދާޅުވެއްޖެއެވެ.

މަލީހް މިފަދައިން ވިދާޅުވެފައިވަނީ އެކްސްގައި ކުރެއްވި ޕޯސްޓެއްގައެވެ.

ތ.އަތޮޅު ގުރާދޫ އަށް ރައީސް ޑރ.މުއިއްޒު ވަޑައިގެން ރައްޔިތުންނާ ބައްދަލުކުރައްވާ އެމަނިކުފާނު ވެވަޑައިގެންނެވި އެއްވެސް ވައުދަކަށް ހިޔާނާތްތެރި ނުވާނެކަމަށް ވިދާޅުވެފައިވާއިރު ރައީސް ޔާމީންގެ އަތްޕުޅުގައި ހިއްޕަވައިގެން ހުވާކުރެއްވުމުގެ ރަސްމިއްޔާތައްް ވަޑައިގެންނަވާނަން ކަމަށް ވިދާޅުވި ވައުދު ފުއްދެވީތޯ ވިދާޅުވެ މަލީހް ވަނީ ސުވާލު އަމާޒު ކުރައްވާފައެވެ.

ތ.އަތޮޅު ގުރާދޫގައި ރ.ޑރ.މުއިއްޒު ވިދާޅުވަނީ ވީއެއްވެސް ވަޢުދަކަށް ޚިޔާނާތްތެރި ނުވާނެ ކަމަށް. ރައީސް ޔާމީން އަތްޕުޅުގައި ހިއްޕަވައިގެން ހުވާކުރައްވަން ވަޑައިގަންނަވަން އަދިވެސް ހުވާ ނުކުރައްވާ ތޯ ތިޔަ ހުންނެވީ? ދޮގު މައްޗަށް ދޮގު. ރައީސް ޔާމީން އަވަހަށް މިނިވަންކުރައްވާ. pic.twitter.com/JNGB03wKQA
— Mohamed Maleeh Jamal (@maleehjamal) February 6, 2024

އޭގެއިތުރުން މަލީހް ވަނީ ރައީސް ޔާމީން މިނިވަން ކުރައްވާނެކަމަށް ވިދާޅުވެ ހެއްދެވީ ދެޮގު މައްޗައް ދޮގުކަމަށް ވެސް ވިދާޅުވެފައެވެ.

ރައީސް މުއިއްޒު އަތޮޅުތަކަށް ކުރައްވަން ފެއްޓެވި ދަތުރުތަކަކީ އަންނަ މަހު ބޭއްވުމަށް ހަމަޖެހިވާ 20 ވަނަ ރައްޔިތުންގެ މަޖިލީހަށް ޕީއެންސީ އަށް މަޖިލިސް މެޖޯރިޓީ ހޯދެއްވުމަށްކަމަށް ގިނަ ފަރާތްތަކުން އަންނަނީ ބުނަމުންނެވެ.