މިއަހަރުގެ މޯލްޑިވްސް މެރިން އެކްސްޕޯގެ ޑިޖިޓަލް ޕާޓްނަރަކަށް އުރީދޫ މޯލްޑިވްސް ހަމަޖެހިފައިވާކަން ހާމަވެއްޖެއެވެ.

މި އަހަރުގެ މެރިން އެކްސްޕޯ ބޭއްވުމަށް ހަމަޖެހިފައިވަނީ މިއަހަރުގެ ފެބުރުއަރީ މަހުގެ 8، 9، 10 އަދި 11 ވަނަ ދުވަހު ހުޅުމާލެ ސެންޓްރަލް ޕާކުގައިއެވެ.

މި އެކްސްޕޯގައި އުރީދޫ މޯލްޑިވްސްގެ ބިޒްނަސް ޓީމުން ހަރަކާތްތެރިވަމުންދާނެ ކަމަށް އުރީދޫ އިން ވަނީ މައުލޫމާތުދެއްވާފައެވެ.

އެގޮތުން މި އިވެންޓްގައި އުރީދޫގެ ސްޓޯލްއަށް ޒިޔާރަތް ކޮށް، އެކި ވިޔަފާރިތަކަށް އުރީދޫއިން ލިބެންހުރި ސޮލިއުޝަންތަކުގެ މައުލޫމާތު ހޯދުމުގެ ފުރުސަތު ލިގެންދާނެ ކަމަށްވެސް އުރީދޫއިން ވަނީ ހާމަކޮށްފައެވެ

ނޭޝަނަލް ބޯޓިން އެސޯސިއޭޝަނުން ކޮންމެ އަހަރަކު ކުރިއަށް ގެންދާ މޯލްޑިވްސް މެރިން އެކްސްޕޯ އަކީ ރާއްޖޭގައި ބާއްވަމުން އަންނަ މަގުބޫލް އިންޓަނޭޝަނަލް އިވެންޓެކެވެ. މި އިވެންޓްގައި މެރިން އާ ގުޅުންހުރި ޕްރޮޑަކްޓްތައް ދައްކާލުމަށް ގިނަ ވިޔަފާރިތަކުން ބައިވެރިވާކަން ފާހަގަކޮށްލެވެއެވެ.

މި އެކްސްޕޯ އަކީ ބޯޓުތަކާއި ކަނޑު އުޅަނދުފަހަރު ބައިނަލްއަގްވާމީ ޕްލެޓްފޯމެއްގައި ދައްކައިލުމަށް ލިބޭ ފުރުސަތެކެވެ.

އެގޮތުން، އުޅަނދުފަހަރު ބަންނަ މީހުންނާއި ސަޕްލަޔަރުންނާއި ހިދުމަތް ފޯރުކޮށްދޭ މީހުންގެ އިތުރުން ބޮޑެތި ކުންފުނިތަކުންނާއި ވިޔަފާރިވެރިންނާ ގުޅުން ބަދަހި ކުރުމުގެ ފުރުސަތު މިއެކްސްޕޯގެ ތެރެއިން ފަހިވެގެން ދާނެއެވެ.