ފަލަސްތީނުގެ ގާޒާ ހިފައި އެމެރިކާގެ ބެލުމުގެ ދަށަށް ގެންނާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވި ވާހަކަތަކަށް އަރަބި ގައުމުތަކުން ދެކޮޅުހަދައިފި އެވެ.

ސަހްޔޫނީންގެ ބޮޑުވަޒީރު ބެންޖަމިން ނަތަންޔާހޫއާ އެކު ވައިޓްހައުސްގައި ބޭއްވި ބައްދަލުވުމަށް ފަހު ޓްރަމްޕް ވިދާޅުވީ ގާޒާ ހިފުމަށްފަހު އެމެރިކާއިން އެތަން އަލުން އާބާދުކޮށް، އެތައް ހާސް ވަޒީފާ އުފައްދާނެ ކަމަށެވެ.

ނަތަންޔާހޫ މިހެން ވާހަކަ ދެއްކުމުން ސައޫދީގެ އިތުރުން ގަތަރު، މިސްރު، އުރުދުން އަދި ޔޫއޭއީން ވެސް ވަނީ އެ ވާހަކަ ވަރަށް ބޮޑަށް ކުށްވެރިކޮށްފަ އެވެ.

ފަލަސްތީނުގެ ރައްޔިތުން ގާޒާއިން ބޭރުކުރަން ކުރާ ކޮންމެ މަސައްކަތަކީ، 1948 ވަނަ އަހަރު އިޒްރޭލު އުފެއްދި އިރު ފަލަސްތީނުގެ ރައްޔިތުން ވަޒަނުން ބޭރުކޮށް ސަހްޔޫނީން އާބާދުކުރަން ހިންގި އަނިޔާވެރި "ނަކްބާ" ގެ އަނދިރި ހަނދާންތައް އާވެގެންދާނެ ކަމެކެވެ.

އަދި އެފަދަ ފިކުރަކީ، ފަލަސްތީނުގެ ރައްޔިތުންނަށް ދިރިއުޅުމުގެ ހައްގު ވެސް އޮތް ކަމަށް ގަބޫލު ނުކުރުން ކަމަށް ވެސް ސައޫދީން ބުންޏެވެ. ގާޒާއިން އެތައް ހާސް ބަޔަކު ޝަހީދުކޮށް މުޅި ތަން ބިމާ ހަމަކޮށްފަ އެވެ.

ގަތަރުގެ ބޮޑުވަޒީރު ޝައިޚް މުހައްމަދު ބިން އަބްދުއްރަހްމާން އަލް ޘާނީ ވިދާޅުވީ ފަލަސްތީނުގެ ރައްޔިތުން ގާޒާއިން ނެރުމަށް ކުރެވޭ އެއްވެސް މަސައްކަތަކަށް އެ ގައުމުން އެއްބާރުލުން ނުދޭނެ ކަމަށެވެ.

މިސުރުގެ ރައީސް އަބްދުލް ފައްތާހު އައް-ސީސީ ވަނީ ގާޒާގެ 2.3 މިލިއަން ރައްޔިތުން އެ ގައުމަށް ބަދަލުކުރުމަށް އިންކާރުކުރައްވަ އެވެ. މިސުރަކީ އެމެރިކާގެ ގާތް އެކުވެރި އަދި އަހަރަކު 1.3 ބިލިއަން ޑޮލަރުގެ އެހީ ލިބޭ ގައުމެކެވެ. އަރަބި ލީގުގެ އަމީން އާންމު އަހުމަދު އަބޫލް ޣައިތު ވިދާޅުވެފައިވަނީ ޓްރަމްޕް އާއި ނަތަންޔާހޫގެ ވާހަކަތަކަކީ ހަގީގަތާ އެއްވެސް ގުޅުމެއް ނެތް ވާހަކަތަކެއް ކަމަށެވެ. އެފަދަ ހިޔާލުތަކަކީ ހަމައެކަނި ހުވަފެންތަކެއް ނުވަތަ ޚިޔާލުތަކެއް ކަމަށް އެމަނިކުފާނު ވިދާޅުވި އެވެ.

ސަހްޔޫނީންގެ މިއަނިޔާވެރިކަމާއި ލާއިންސާނިއްޔާތާއި ޓެރަރިޒަމްގެ ފަހަތުގައި އޮތީ އެމެރިކާއާއި ޔޫރަޕްގެ ބާރުތަކެވެ. އިސްރާއީލުގެ ޓެރަރިޒަމް ސްޕޮންސާ ކުރާ މައިގަނޑު ހަތަރު ގައުމަކީ ވެސް ހުޅަނގުގެ ހަތަރު ގައުމެވެ. އެއީ އެމެރިކާ، އިނގިރޭސިވިލާތް ޖަރުމަނު އަދި ފަރަންސޭސިވިލާތެވެ.

ގާޒާގެ ސަރުކާރާ އަދި ހުޅަނގު އައްސޭރީގައި ގާއިމްކޮށްފައިވާ ފަލަސްތީނުގެ ވެރިކަމުގެ އިދާރާ ބުނާގޮތުން ގާޒާ އަލުން ބިނާކޮށް އާރާސްތު ކުރުމުގެ މަސައްކަތް ފެށޭނީވެސް ގައުކުނޑިތައް ނަގައި ގާޒާގެ ރައްޔިތުންނަށް ވަގުތީ ހިޔާވަހިކަން ލިބިދޭ ފޭލިގެތައް ޖަހައިގެންނެވެ. 6.5 ބިލިޔަން ޑޮރަލު ހަރަދުވަނީ މިކަންކަމަށެވެ.