ވެލާނާ އިންޓަނޭޝަނަލް އެއާޕޯޓަށް އިންޑިއާގެ އެއާފޯސްގެ މަތިންދާ ބޯޓެއް ޖެއްސިކަން ހާމަކޮށްދޭ ފޮޓޯތަކެއް ސޯޝަލް މީޑިއާގައި ދައުރުވާން ފަށައިފިއެވެ.

މިކަން ހާމަވެފައިވަނީ އާންމު ރައްޔިތެއް އެކްސްގައި ކުރެއްވި ޕޯސްޓެއްގައެވެ.

އެ ފޮޓޯތަކުން އިންޑިއަން އެއާ ފޯސްގެ މަތިންދާ ބޯޓު ސީއޭ 7106ވަނީ އިއްޔެގެ ވަގުތެއްގައި ރާއްޖޭގެ މައި އެއާޕޯޓަށް ޖައްސާފައިވާކަން ހާމަވެފައެވެ. މިކަން ކަށަވަރުން ކުރުމަށްޓަކައި 13 އޮންލައިނުން ޑިފެންސް މިނިސްޓްރީއަށް ގުޅި ނަމަވެސް ފޯނު ނުނެގުމުގެ ސަބަބުން އެކަންވަނީ ކަށަވަރު ނުވެފައެވެ.

މި ސަރުކާރުން ވަނީ އިންޑިއާ ސިފައިން މި ގައުމުން ބާލާފައިކަމަށް ބުނަމުން ދާއިރު ކުރިން ތިބި އަސްކަރީ މީހުން ބޭލުމަށް ފަހު ހަމަ އެ އަދަދަށް ހިންދުސްތާނު އަސްކަރިއްޔާގެ ދަށުން ހިންގާ އެޗްއޭއެލްގެ މީހުން ގެނެސްގެން ސަރުކާރުން ވަނީ ބޮޑު އޮޅުވާލުމެއް ދިވެހި ރައްޔިތުންނަށް އޮޅުވާލާފައެވެ.

ރައީސް މުއިއްޒު ވަނީ ޔުނިފޯމު ލައިގެންވެސް ނުލާވެސް ބޭރުގެ އަސްކަރިއްޔާ ރާއްޖޭގައި ނުތިބޭނެކަމަށް ވިދާޅުވެފައެވެ. ނަމަވެސް ފެންނަ މަންޒަރުތަކުން އެއީ އިތުރުފުޅެއްކަން ދަނީ ހާމަވަމުންނެވެ.