ސަހްޔޫނީ ސިފައިން ބުރާސްފަތި ދުވަހު ހުޅަނގު އައްސޭރީގައި ވަޅިން ހަމަލާދިން ކަމަށް ތުހުމަތު ކުރެވޭ ފަލަސްތީނުގެ މީހެއްގެ ގެ ވެސްޓް ބެންކް ސަރަހައްދުގައި ތަޅާލައިފިއެވެ.

މަންޒަރު ދުށް މީހުން ބުނި ގޮތުގައި ސަހްޔޫނީންގެ ސިފައިން ވަނީ ތިން ބުރީގެ ގެއެއްގައި ތިބި މީހުން ހުސްކޮށް، ހުޅަނގު އައްސޭރީގެ އުތުރުގެ ސަލްފިޓް ސިޓީގައި ހުރި އިމާރާތެއް ގޮއްވާލާފައެވެ.

އެ ގެއަކީ މިދިޔަ އޮގަސްޓް މަހު ޓެލް އަވީވް ކައިރީގައި އޮންނަ ހޮލޮން ސިޓީގައި ވަޅިން ހަމަލާދީ ސަހްޔޫނީންގެ ދެ މީހަކު މަރުވެ ދެ މީހަކު ޒަހަމްވި ކަމަށް ސަހްޔޫނީން ތުހުމަތުކުރި އުމަރު އަވްދާގެ ގެއެކެވެ. އަވްދާހު ބަޑިޖަހައި މަރާލާފައި ވަނީ ސަހްޔޫނީންގެ ސިފައިންނެވެ.

އަހަރުތަކެއް ވަންދެން ސަހްޔޫނީންން ގެންގުޅެމުން އައީ ސަހްޔޫނީންގެ އަމާޒުތަކަށް ދޭ ހަމަލާތަކުގައި ބައިވެރިވި ކަމަށް ތުހުމަތު ކުރެވޭ ފަލަސްތީނުގެ އާއިލާތަކަށް އަދަބު ދިނުމުގެ ގޮތުން ގެދޮރު ތަޅާލުމުގެ ސިޔާސަތެކެވެ.

ޖެނިން ރެފިއުޖީ ކޭމްޕަށް ސިފައިން ފޮނުވާލި އިރު، އެ ސަރަހައްދުގައި ހުރި ފަލަސްތީނުގެ ގެތައް ތަޅާލުމުގެ މަސައްކަތް ބުލްޑޯޒަރުން ކުރިއަށް ގެންދިޔަ ކަމަށް މަންޒަރު ދުށް މީހުން ބުނެ އެވެ.

ސަހްޔޫނީ ސިފައިންނާއި ގަވާއިދާ ހިލާފަށް ވަޒަންވެރިވި މީހުންގެ ހަމަލާތަކުގައި ފަލަސްތީނުގެ 920 މީހުން މަރުވެ ގާތްގަނޑަކަށް 7،000 މީހުން ޒަޚަމްވެފައިވާ ކަމަށް ހެލްތު މިނިސްޓްރީން ބުނެފައިވެއެވެ.