

މިހާރުގެ ސުޕްރީމް ކޯޓުގެ ފަނޑިޔާރުން ތިއްބެވީ ސިޔާސީ އޮއިވަރުގައި ޖެހިގެން ކަމަށާއި އަދި ސިޔާސީ ކަންކަމުގެ ތެރެއަށް ވަދެ ސިޔާސީ ހުކުމްތައް ނެރެމުންދާ ކަމަށް ރައްޔިތުންގެ މަޖިލީހުގެ ނައިބު ރައީސް އަހުމަދު ނާޒިމް މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި އޮތީ ސުޕްރީމް ކޯޓު ބެންޗުގައި ތިއްބަވާ ހަތް ފަނޑިޔާރުންގެ ތެރެއިން ދެ ފަނޑިޔާރުން ވަކިކޮށް، ބެންޗު ފަސް ފަނޑިޔާރުންނަށް މަދުކުރަން ހުށަހެޅި ބިލުގެ އިބްތިދާއީ ބަހުސެވެ.
ބަހުސްގައި ވާހަކަދައްކަވަމުން ނާޒިމް ވިދާޅުވީ މިއަދު އެ ބިލަށް ބަހުސްކުރާއިރު އެ މައުޟޫއުގައި އެއްޗެއް ބުނުން އެންމެ އައުލާކަން ބޮޑީ އޭނާ ކަމުގައެވެ.
ނާޒިމް ވިދާޅުވީ ސުޕްރީމް ކޯޓުގެ ފަނޑިޔާރުންނަކީ ސިޔާސީ އޮއިވަރުން އެއްކިބާވެ ތިއްބަވަން ޖެހޭ ބައެއް ކަމަށެވެ. ނަމަވެސް މިއަދު ފެންނަނީ އެ މަންޒަރު ނޫން ކަމަށް އޭނާ ވިދާޅުވި އެވެ.
އަޅުގަނޑުމެންނަށް މިއަދު ފެނިގެން މި ދަނީ ސިޔާސީ އޮއިވަރުގައި ޖެހިގެން ނުވާނެ ބަޔަކު ސިޔާސީ އޮއިވަރަށް ލެނބިގެން ދާތަން، އަދި ސިޔާސީ ވެރިން ޖަހާ ބެރުތަކަށް ނެށުމަށް ތައްޔާރަށް ތިބި ކަމުގެ ސިގްނަލްތައް ދެމުންދާތަން،
ނާޒިމް ވަނީ މަޖިލީހުގެ މެންބަރުންގެ ގޮނޑި ގެއްލޭ ގޮތަށް ގާނޫނުއަސާސީއަށް ގެނެސްފައިވާ އިސްލާހު ބާތިލް ކުރަން ހުށަހެޅި މައްސަލަ ސުޕްރީމް ކޯޓުން ކުރިއަށް ގެންދާތީ އެކަމަށް ވެސް ފާޑު ވިދާޅުވެފަ އެވެ.
ނާޒިމް ވިދާޅުވީ ފަނޑިޔާރުން ވާންޖެހޭނީ ސިޔާސީ ކަންކަމުން ބަރީއަވެގެން ތިބެންޖެހޭ ބަޔަކަށް ކަމަށާއި ނަމަވެސް، އެކަން އެގޮތަށް ނުވުމަކީ ހިތާމަކުރާ ކަމެއް ކަމަށެވެ. އަދި އޭނާ ވިދާޅުވީ ސުޕްރީމް ކޯޓުން މިހާރު ފެންނަނީ ސިޔާސީ ކަންކަމުގެ ތެރެއަށް ވަދެ، ސިޔާސީ ހުކުމްތައް ކުރާ ތަން ކަމަށެވެ.
ނާޒިމް އެފަދައިން އެ ވިދާޅުވީ ޕާޓީއަކުން ވަކިކުރާ މެންބަރުންގެ ގޮނޑި ގެއްލޭ ގޮތަށް ޕީއެންސީން ގާނޫނުއަސާސީއަށް ގެނައި އިސްލާހުގެ މައްސަލަ ސުޕްރީމް ކޯޓުގައި ހިނގަނިކޮށް، އެ މައްސަލަ ސުޕްރީމް ކޯޓުގައި ކުރިއަށް ގެންދަން އެ ކޯޓުން ނިންމާފައިވަނިކޮށެވެ. ދައުލަތުން ވަނީ އެ މައްސަލައަކީ ސުޕްރީމް ކޯޓަށް ބެލޭނެ މައްސަލައެއް ނޫން ކަމަށް ބުނެފައެވެ. އެ މައްސަލަ ސުޕްރިމް ކޯޓަށް ހުށަހެޅުއްވީ ކުރީގެ ކެންދޫ ދާއިރާގެ މެންބަރު އަދި ގާނޫނީ ވަކީލު އަލީ ހުސައިނެވެ.