ރައީސް މުހައްމަދު މުއިއްޒު ނުރަސްމީ ދަތުރުފުޅެއްގައި ސިންގަޕޫރަށް ވަޑައިގަންނަވަނީ، ވިފާޣު އިބްރާހިމު އަދުނާނުގެ މަރުގެ ތުހުމަތު އޮތް، ވިފާގުގެ ދޮން ބައްޕަ ރައްޔިތުންގެ މަޖިލީހުގެ ނައިބު އަހުމަދު ނާޒިމްއާ ބައްދަލުކުރަން ކަމަށް ކުރިގެ ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދު މިފަދައިން ވިދާޅުވެފައިވަނީ، އެމަނިކުފާނުގެ ނުރަސްމީ އެކްސް އެކައުންޓު ކަމަށްވާ "އަނެއް ދިވެހިރާއްޖެ" އެކައުންޓުން ކުރެއްވި ޕޯސްޓެއްގައެވެ.
އެ ޕޯސްޓުގައި ވިދާޅުވެފައިވަނީ، ރައީސް ސިންގަޕޫރަށް ވަޑައިގަތީ ނާޒިމާ ވާހަކަފުޅު ދެއްކެވުމަށް ކަމަށް ޚަބަރު ލިބިވަޑައިގެންފައިވާ ކަމަށެވެ. އެހެންނަމަވެސް ނާޒިމް، އެމަނިކުފާނާ ވާހަކަދައްކަފާނެ ކަމަށް ނުބެއްލެވޭ ކަމަށް ނަޝީދު ވިދާޅުވިއެވެ.
ނަޝީދު މިފަދައިން ވިދާޅުވެފައިވާއިރު، ކުރިން ރައީސްގެ ދަތުރުފުޅުގެ ތަފްސީލު ނުދީ ތިބުމަށް ފަހު ރައީށް އޮފީހުން މިހާރު ވަނީ އެކަން ދޮގުކޮށްފައެވެ. އެގޮތުން ސަރުކާރުގެ އިސް ތަރުޖަމާނު މުހައްމަދު ހުސައިން ޝަރީފު ވިދާޅުވެފައިވާ ގޮތުގައި ރައީށް ސިންގަޕޫރަށް ވަޑައިގެންނެވީ އާއިލާއާ އެކު ޗުއްޓީ ހޭދަކުރެއްވުމަށެވެ.
ނަޝީދު މިފަދައިން ވިދާޅުވިއިރު، މަޖިލީހުގެ ނައިބު ރައީސް ކަމުން ނާޒިމް ވަކިކުރަން ޕީއެންސީގެ މެންބަރުން މަސައްކަތްކުރަނީ، ނާޒިމާއެކު ޕީއެންސީގެ 23 މެންބަރަކު ޕާޓީ ބަދަލުކުރައްވައި، ރައީސްގެ މައްޗަށް އިތުބާރު ނެތް ކަމުގެ ވޯޓެއް ނަގަން އުޅުއްވާތީ ކަމަށް އަޑުތައް ގަދަވެފައިވެއެވެ.
