

ރޯދަ މަހާ ދިމާކޮށް މަސްޖިދުލް އަގްސާއަށް ވަނުމަށް އިތުރު ދަތިތައް ކުރިމަތި ކުރުވަން ސަހްޔޫނީން ވިސްނަމުން ދާ ކަމަށް ސަހްޔޫނީންގެ މީޑިއާއިން ހޯމަ ދުވަހު ރިޕޯޓުކޮށްފިއެވެ.
ކަން އިން ރިޕޯޓު ކުރާ ގޮތުގައި ޣައްޒާގެ ހަނގުރާމަ ހުއްޓާލުމުގެ އެއްބަސްވުމުގެ ދަށުން ދޫކޮށްލެވުނު ފަލަސްތީނު މީހުން މިސްކިތަށް ވަނުން މަނާކުރެވޭނެއެވެ. މީގެ އިތުރުން މިސްކިތަށް ވާސިލުވާ ޗެކްޕޮއިންޓްތަކުގައި 3،000 ފުލުހުން ބޭތިއްބުމަށް ވަނީ ނިންމާފައެވެ.
55 އަހަރުން މަތީގެ ފިރިހެނުންނާއި، 50 އަހަރުން މަތީގެ އަންހެނުންނާއި، 12 އަހަރުން ދަށުގެ ކުޑަކުދިން ހިމެނޭ މަދު އަދަދެއްގެ ބަޔަކަށް ރަމަޟާން މަހު މިސްކިތަށް ވަދެވޭނެއެވެ. ހުކުރު ނަމާދަށް ވަދެވޭނީ 10،000 މީހުންނަށެވެ. އަދި ނަމާދަށް ވަންނަން ބޭނުންވާ ފަރާތްތަކުން ކުރިއާލާ ހުއްދައަށް އެދެންޖެހޭނެއެވެ.
އިތުރު ރިޕޯޓުތަކުން ބުނާ ގޮތުގައި މި ސަރަޙައްދުގެ ސަލާމަތީ ރޭވުންތަކާ ގުޅޭގޮތުން ސަހްޔޫނީންގެ ޑިފެންސް މިނިސްޓްރީއާއި، ޝިން ބެޓް އިންޓެލިޖެންސް އޭޖެންސީ އާއި، ސިފައިންނާއި، ފުލުހުންނާއި، ޖަލު އޮތޯރިޓީއާ އެކު ގިނަ މަޝްވަރާތަކެއް ވަނީ ބޭއްވިފައެވެ.
މަސްޖިދުލް އަޤްޞާއަކީ މުސްލިމުންގެ ތިންވަނަ އަށް އެންމެ މުޤައްދަސް ތަނެވެ. ކޮންމެ އަހަރެއްގެ ވެސް ރަމަޟާން މަހާއި ދިމާ ކޮށް މަސްޖިދުލް އަޤްޞާ އަށް އަޅުކަން ކުރަން ވަންނަ ފަރާތްތަކަށް ފިއްތުންތައް ކުރިމަތި ކޮށް ހަމަ ނުޖެހުންތައް ހިންގުމަކީ ސަހްޔޫނީންން ކުރަމުން އަންނަ ކަމެކެވެ.
ކޮންމެ އަހަރެއްގެ ރޯދަ މަހު މިސްކިތުގައި ހިންގާ ރެއިޑްތަކުގެ ސަބަބުން ގިނަ ފަހަރު ހަމަނުޖެހުންތައް ހިނގާފައިވެއެވެ.