ސަރުކާރުގެ ލެޖިމެޓަސީ ނުވަތަ ސައްހަކަން ގެއްލި ނަޙަލާލު ސަރުކާރަކަށް ރައީސް ޑރ މުހައްމަދު މުއިއްޒުގެ ސަރުކާރު ވެއްޖެ ކަމަށް ކުރިގެ ނައިބު ރައީސް، ޑރ މުހައްމަދު ޖަމީލު އަހުމަދު ވިދާޅުވެއްޖެއެވެ.

ޑރ ޖަމީލު މިފަދައިން ވިދާޅުވީ ރާއްޖޭގެ ތާރީޚުގައިވެސް އެންމެ ގިނައިން ފައިސާ ޗާޕުކުރަން މި ސަރުކާރުން ނިންމާ ގަވަރުނަރު އެކަމަށް ތާއީދުކޮށްފައިވާތީ އެކަމަށް އިޝާރާތްކުރައްވާ ކުރެއްވި އެކްސް ޕޯސްޓެއްގައެވެ.

ޑރ ޖަމީލު ވިދާޅުވީ، މުނައްވަރު ގަވަރުނަރަކަށް ކުފޫހަމަ ނުވާ ކަމަށާ އިސްތިއުފާ ދެއްވާ ގެއަށް ވަޑައިގަންނަވަން ޖެހޭ ކަމަށެވެ. އަދި މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ދައުރާއި، ދާއިރާ ވެސް މުނައްވަރަށް އެނގިވަޑައި ނުގަންނަވާ ކަމަށާ ގަވަރުނަރު ކަމަކީ ސަރުކާރުން ޖަހާހާ ބެރަކަށް ނަށައިގެން އަދާކުރެވޭ މަސްއޫލިއްޔަތެއް ނޫން ކަމަށް ވެސް ވިދާޅުވެ ޑރ ޖަމީލު ވަނި މުނައްވަރުގެ އަމަލުތަކާ މެދު ފާޑުވިދާޅުވެފައެވެ.

އެމްއެމްއޭގެ ހައްސިއްޔަތު މިހާރު އޮޅިއްޖެކަމަށް ދޭހަވާ ފަދަ މޭރުމަކުން ލިޔުއްވާ ޑރ ޖަމީލު ވިދާޅުވީ، މިހާރު އެމްއެމްއޭއަކީ މޯލްޑިވްސް މަނިޓަރީ އޮތޯރިޓީ ޕްރައިވެޓް ލިމިޓެޑް ކަމާ މެދު ސުވާލު އުފެދޭ ކަމަށެވެ. ނުވަތަ އެމްއެމްއޭއަކީ ފިނޭންސް މިނިސްޓްރީގެ ގޮތްޕެއްތޯ އައްސަވާ ވެސް ޑރ ޖަމީލު ވަނީ ނުރުހުން އަމާޒުކުރައްވާފައެވެ.

ސަރުކާރުގެ ބަޖެޓް މިނަށް ވުރެ ބޮޑުވާ ވާހަކަ، ސަރުކާރުގެ ސިޔާސީ މަގާމުތައް ގިނަވާ ވާހަކަ ފަދަ ކަންތަކުގައި އެމްއެމްއޭއަށް ސަރުކާރަށް މަޝްވަރާ ދެވޭތޯ އާ ފައިސާ ޗާޕްކޮށްގެން ޙައްލު ހޯދާނަމަ، ޓެކްސް ބޮޑުކުރީ ކީއްވެތޯ ވެސް ޑރ ޖަމީލު ވަނީ އައްސަވާފައެވެ.

ގައުމު ބަނގުރޫޓްވެ ލަންކާ ދަތުރުކުރި މަގަށް މިސްރާބު ހިފާފައި ހުރި ނާޒުކު ވަގުތެއްގައި ގަވަރނަރަކަށް ސީރިއަސް ބޭފުޅަކު ބޭނުންވާ ކަމަށް ވިދާޅުވެ ޑރ ޖަމީލު ވަނީ މުނައްވަރު ސަރުކާރު ބޭނުން ކޮންމެ ޣައިރު ގާނޫނީ ކަމެއް ކުރާކަން ފާހަގަކުރައްވާފައެވެ. އަދި މުނައްވަރު ކުރިން ވަޒީރުކަންކުރީ ރައީސް އަބްދުﷲ ޔާމީނުގެ އިރުޝާދު ލިބިގެން ނަމަވެސް ރައީސް މުއިއްޒަކީ އެ ގާބިލުކަން ހުންނެވި މީހެއް ނޫން ކަމާ އިގްތިސާދީ ކަންތަކުގައިވެސް ވާނުވާ ރައީސް މުއިއްޒަށް ނޭނގޭ އިރު މުނައްވަރަށް ދޭނެ ލަފައެއްވެސް މުއިއްޒުގެ ކިބައގައި ނުހުންނާނެ ކަމަށް ޑރ ޖަމީލު ވަނީ ވިދާޅުވެފައެވެ.

މީގެ އިތުރުން ގައުމު ސަލާމަތްކުރަން މުނައްވަރު މަގާމުން ދުރަށްދާން ޖެހޭ ކަމަށްވެސް ޑރ ޖަމީލު ވަނީ ވިދާޅުވެފައެވެ.

ޑރ ޖަމީލު މިފަދައިން ފާހަގަކުރައްވާފައިވާއިރު. މި ސަރުކާރުން ވަނީ ރާއްޖޭގެ ތާރީހުގައި ވެސް ޗާޕުނުކުރާ ވަރަށް ފައިސާ ޗާޕުކުރަން ނިންމާ 14 ބިލިއަން ރުފިޔާ ޗާޕުކުރަން ނިންމާފައެވެ. އެގޮތަށް ނިންމީ އެމްއެމްްއޭގެ ބޯޑުން އެ ނިންމުން ނިންމި ދުވަހު ބޯޑަށް ހާޒިރުވީ ފަސް މެންބަރުންގެ ތެރެއިން ރިޔާސަތު ބަލަހައްޓަވަން އިން ގަވަރުނަރު މުނައްވަރުގެ ވޯޓު ނުލާ ވޯޓު އެއްވަރުވުމުން މުނައްވަރުގެ ވޯޓު ފައިސާ ޗާޕުކުރުމާ އެއް ކޮޅަށް ދެއްވުމުންނެވެ.