މިހާރު އޮތް ރައްޔިތުން މަޖިލީހަކީ އެންމެ މޮޔަ މެމްބަރުން ތިބި މަޖިލީހުގެ ގޮތުގައި ދިވެހި ރައްޔިތުން ތާރީހުގައި ލިޔާނެ ކަމަށް ޕީޕަލްސް ނެޝަނަލް ފްރޮންޓް (ޕީއެންއެފް)ގެ ސެކެރެޓަރީ ޖެނެރަލް މުހައްމަދު މަލީހު ޖަމާލު ވިދާޅުވެއްޖެއެވެ.

މަލީހު މިފަދައިން ވިދާޅުވީ، ބުރާސްފަތި ދުވަހުގެރޭގެ ޕީއެންއެފްގެ ޖަލްސާގައި ވާހަކަފުޅު ދައްކަވަމުންނެވެ.

މަލީހު ވިދާޅުވީ، ރައްޔިތުންގެ ހައްގުގައި ވަކާލާތަު ކުރަން އެ ބޭފުޅުން ޖެހިލުން ނުވާނެ ކަމަށާ އަބަދުވެސް ރައްޔިތުންގެ ހައްގުގަައި އަޑު އުފުލާނެ ކަމަށް މަޖިލީހުގެ ބައެއް މެމްބަރުން ވިދާޅުވެފައިވާ ކަމަށެވެ. ނަމަވެސް މިއަދު ފެނިގެން ދަނީ އެންމެ އަޑު ހަރުކޮށް އެ ވާހަކަ ދެއްކެވި މެމްބަރުންގެ މައިކުން އަޑު ކެނޑިފައިވާ މަންޒަރު ކަމަށް ވެސް މަލީހު ވިދާޅުވިއެވެ. އެގޮތުން ބާރަށު މައިކާ ބޮޓޭކޯ މެން ފަދަ މައިކުން އަޑު ކެނޑިފައިވާ ކަމަށް މަލީހު ވިދާޅުވިއެވެ.

މަލީހު ވިދާޅުވީ މިއަދުގެ މަޖިލިސް މެމްބަރުން ތިބީ ކޮމްޕްރޮމައިޒްވެފައި ކަމަށެވެ. މަލީހު މިފަދައިން ވިދާޅުވެފައިވާއިރު ރައީސް މުހައްމަދު މުއިއްޒު ވަނީ ޕީއެންސީ މަޖިލިސް މެމްބަރުން ކަސްތަޅު އަޅުވާ ގޮނޑީގައި ބަންނަން އެންޓި ޑިފެކްޝަން ގާނޫނު ތަސްދީގުކުރައްވާފައެވެ.