ރޯދަ މަހުގެ ފަހު ދިހަޔަަކަށް މެދު ކަނޑާލުމަށް ފަހު، ޕީޕަލްސް ނެޝަނަލް ފްރޮންޓު (ޕީއެންއެފް)ގެ ޖަލްސާތައް ބުރާސްފަތި ދުވަހުގެ ރޭ ފަށާނެ ކަމަށް އެ ޕާޓީއިން ހާމަކޮށްފިއެވެ.
ޕީއެންއެފުން ހާމަކުރާ ގޮތުގައި ޖަލްސާތައް މި ބުރާސްފަތި (10 އެޕްރިލް 2025) ދުވަހުގެ ރެއިން ފަށާނެ ކަމަށާ ޖަލްސާތައް ދެން ކުރިއަށް ދާނީ އިހުނަށްވުރެ ވެސް ފޯރިގަދަކޮށްކަމަށްވެސް ހާމަކޮށްފައިވެއެވެ.
މި ޖަލްސާތަކުގައި ކަމު ވޮށީގެންވާ ބޭފުޅުން ގައުމުގެ އެކި ކަންކަމަށް ނަޒަރު ހިންގާލައްވާ ވާހަކަ ދައްކަވާ އިރު ރައީސް އަބްދުﷲ ޔާމީން ވެސް ޖަލްސާތަކުގައި ބައިވެރިވެވަޑައިގެން ގައުމުގެ ކަންކަން ހިނގަމުންދާ މަގަށް ނަޒަރު ހިންގަވާލައްވާ ވާހަކަފުޅު ދައްކަވާ ކަންކަން ހަރުދަނާ ކުރުމަށް ކުރެވޭނެ ކަންކަން ފާހަގަކުރައްވައެވެ.
ޖަލްސާތަކުގައި ގައުމުގެ އިޖްތިމާއީ، އިގްތިސޯދީ އަދި މާލީ ހާލަތަށްވެސް ނަޒަރު ހިންގަވާ ލައްވާ އެކި ރޭގެ ޖަލްސާތަކުގައި ބޭނުންތެރި މައުލޫމާތުތައް ފޯރުކޮށްދެއްވައެވެ.
ރައީސް ޔާމީންގެ ބިނާކުރަނިވި ފިކުރަށް ތާއީދުކުރައްވާ އަދި އެމަނިކުފާނަށް ސަޕޯޓުކުރައްވާ އަދި ލޯބިވާ ހުރިހާ ސަޕޯޓަރުންވެސް ބުރާސްފަތި ދުވަހުގެ ރޭގެ ޖަލްސާގައި ބައިވެރިވުމަކީ ޕީއެންއެފްގެ ވަރަށް ބޮޑު އެދުމެއް ކަމަށް އެ ޕާޓީއިން ހާމަކުރެއެވެ.
ޖަލްސާ އޮންނާނީ ބުރާސްފަތި ދުވަހުގެރޭ 08:45 ގައި ހ. ދުވެހީގެ ފުރަތަމަ ފަންގިފިލާގައި ހުންނަ އެ ޕީއެންއެފްގެ އޮފީހުގައެވެ.
