މިދިޔަ އަންގާރަ ދުވަހުގެ ރޭ ކަސްޓަމްސްއިން އަތުލައިގަތް 18 ކިލޯގެ ޑްރަގު މައްސަލައިގައި އެ މުދާތައް ކްލިއާ ކުރަން ދިޔަ ބިދޭސީ މީހާ ފުލުހުން މިއަދު ދޫކޮށްލައިފި އެވެ.

އިންޑިއާގެ ބެންގަލޫރުން އައި ފްލައިޓަކުން ގަސް ޕޮޓްތަކެއްގައި ފޮރުވައިގެން ރާއްޖެ އެތެރެ ކުރަން އުޅުނު 18 ކިލޯގެ ޑްރަގު ކަސްޓަމްސްއިން އަތުލައިގަތީ، އަންގާރަ ދުވަހުގެ ރޭ އެ މުއައްސަސާއިން ހިންގި ހާއްސަ އޮޕަރޭޝަނެއްގަ އެވެ.

އެ ތަކެތީގެ އަގު ގާތްގަނޑަކަށް 26 މިލިއަން ރުފިޔާއަށް އަރާ ކަމަށާއި އެ ޑްރަގު ހުރި ޝިޕްމަންޓް ކްލިއާ ކުރަން ދިޔަ 35 އަހަރުގެ ބަންގްލަދޭޝްގެ ބިދޭސީއަކު އެ ރޭ ފުލުހުން ހައްޔަރު ކޮއްފައި ވާކަމަށް ފުލުހުން ހާމަކޮށްފައި ވެއެވެ. ނަމަވެސް މިއަދު އޭނާ ދޫކޮށްލި ކަމަށް ފުލުހުން ބުނެފައި ވެއެވެ.

އޭނާ ދޫކޮށްފައިވަނީ ފުލުހުންގެ ތަހުގީގަށް ބެލިބެލުމުން، މަސްތުވާތަކެތި ރާއްޖެ އެތެެރެ ކުރި ބަޔަކާއި މުދާ ކްލިއާ ކުރަން ދިޔަ މީހާއާ ގުޅުމެއް އޮތް ކަމަށް ނުފެންނާތީ ކަމުގައި ފުލުހުން ހާމަކޮށްފައިވެއެވެ.

މިއީ މިހާތަނަށް އެއްފަހަރާ އެންމެ ގިނައިން ރާއްޖެއިން މަސްތުވާތަކެތި އަތުލައިގަތް އޮޕަރޭޝަނެވެ.